Gaza, Risaw 17 (UNI)
Kumba 11 ngut ki nongthoh khubor ka Palestine ki la shah pynïap bad sa 20 ngut ki la mynsaw na ka jingther jong ka Israel ïa ka Gaza Strip naduh ka 7 tarik Risaw, la ong ka Palestinian Journalists Syndicate ha ka Lah Sngi U Blei.
Ha u kyrwoh khubor, katei ka kynhun ka la ong ba 50 ngut ki nongthoh khubor na ka thaiñ bad na kylleng ka pyrthei ki la ngat ha ka jingshah thombor da ki ‘nam ding jong ka Israel ha Gaza.
Nalorkata, ki don sa arngut ki nongthoh khubor kiba la jah rngai katba ki dang leit wad khubor halor ka jingïakynad hapdeng ka Hamas bad ka Israel, la bynrap katei ka Syndicate.
Shuh shuh la ong ba ka jingduna ka bording bad ka jingthut ka Internet ha Gaza ka la buh jingeh ïa ki nongthoh khubor ban trei ban ktah ha ka rukom kaba dei.
“Kiba bun ki nongthoh khubor ki la shah byrngem byrsit na ka liang ka Israel ha ki rynsan ‘Social Media’,” la ong ka Syndicate da kaba kyntu ïa ki kynhun ha ka pyrthei ba kin tuklar ban ai jingïada ïa ki nongthoh khubor.
