Shillong, Risaw 17
U President ka Sengbah Nongshad Nongkheiñ Hynñiewskum Hynñiewtrep, Bah Pran Jala u la ïathuh ba ki kham bun kiba la long Khristan kiba wan phah duwai ha jaka ba ki ju peit ïa ki nongpang kaba don ha Baniun, Upper Shillong.
Kane ka Sengbah Nongshad Nongkheiñ Hynñiewskum Hynñiewtrep ka dei ba la seng ha u snem 1982 kaba la pynbit pynbiang ha Madanrting ban long kawei ka seng ban pynïar ïa ka jingtip ha ka leh-niam leh-rukom ban duwai ban phirat khnang ba ka jingngeit tynrai kan nym jah noh na ka bynta ka pateng ban wan.
Haba ïakren kyrpang bad u Bah Pran Jala ha shlem treikam ha Baniun u la ïathuh ba ha ka shi taïew ki don ki tymmen kiba ai dawai kiba pynduwai ïa kiba wan phah peit na kiba bun ki jait jingpang kum ka daw ïing daw sem, ka jingshitom khrew ki jingpang kiba wan na ki bor mariang.
“Haba ngi duwai haba ki wan phah peit, ngi ju leh da ka pylleng ban ïasaid na bynta jong ki” u la ong.
U la ïathuh ba ym tang kiba dang dei na ka niam tynrai kiba wan phah duwai, hynrei ki bun ki Khristan kiba wan phah duwai namar ngi shim ba ki dei ki paradoh parasnam.
Nalor kane, u la ïathuh ba ïa ka pylleng ki ju pyndonkam da ka syiar khasi, hynrei ka pylleng syiar pham kam long ban duwai hakhmat U Blei.
Shuh shuh u la ïathuh haba nguh ka dem ïa ka mariang, ka raid ka it ka hima la ju leh da ka syiar kynthei bad haba nguh ka dem ïa u basa ryngkew la leh da u syiar shynrang.
Nangta ban shim bujli ïa ka kam President hap shim beit da u ‘riew rangbah uba la tip bha ïa ka jinglehniam ym dei ban ïaleh da ka ilekshon namar ïoh jied ïa u briew u bym nang ban lehniam.
U la batai ba ka jingngeit ha ka niam Khasi ka long ba dei ban thang khnang ba ka Syiem ding kan pynkhuid pynsuba ban pynkhuid ïa ka mei mariang.
Nalor kata, u la ïathuh ba don ki jaka jong ka tnad seng Khasi ki shu tep namar kim don shuh kiba lehniam, hynrei ka Sengbah Nongshad Nongkheiñ ka ju leit ban lehniam ha kito ki shnong lada ym don shuh kiba lehniam.
“Kaba phylla shisha ka long ba lada dei ka por ba mut thang ïa ka metïap lada jur u slap haba ngi la duwai wat u slap ruh u sangeh noh ban ailad ban thang” u la ong.
