Nongstoiñ, Risaw 17
Ki nongïalam ka Hynñiewtrep Achik National Movement (HANM) West Khasi Hills ha ka Lah Sngi U Blei jong ka taïew, ki la leit ban ïakynduh ïa u Deputy Commissioner (DC) ka West Khasi Hills ban pyntip ïa u halor ka jingthmu jong ka HANM ban leit ïa shim bynta sha ka jingïakhih na ka bynta ki mat jong ka jaidbynriew sha nongbah Delhi.
U Bah Willstone Sohshang, President ka HANM, WKHD u la ong ba ka HANM ha ka jingïakynduh bad u DC ka la ïakren ruh halor ka jingïoh ïa ka jingujor na kiba bun ki paidbah halor ka jingbym wan trei tista jong ki nongtrei sorkar ha ki tnat treikam bapher bapher jong ka West Khasi Hills District.
U la ong ba ka seng halor kane ka bynta ka la kyntu ïa u DC ba un shim khia ïa kane. Na ka liang u DC u la ong ba u la dep ban hukum sha baroh ki tnat treikam ba kim dei ban jah khlem ka jingtip jong u DC bad lada ki jah ruh ki dei ban ai da ka jingthoh.
Ha kajuh ka por ka HANM ka kyntu ïa baroh ki ophisar bad ki nongtrei bapher bapher ha ki tnat sorkar jong ka District ba kin trei minot ïa la ka jong ka kam khnang ba kan long ka jingmyntoi na ka bynta ki paidbah khamtam ïa kiba wan donkam na ki shnong kiba kham pajih.
U Bah Willstone u la ïathuh ba na ka liang jong ka HANM ka la ïakren bad u DC ba lada kan dang lap nangne shakhmat kan leh da kaba tyngeh.
