Shillong, Risaw 17
Ka jinglehniam bad ka jingleh burom kaba khatduh ïa u President ka Seng Khasi Kmie, Rangbah Don Kupar Dkhar kan sdang ha ka nohphai sngi jong ka 18 tarik u Risaw, 2023 na ïingsah jong u kaba ha Lumshyiap, Golflink, Shillong bad yn rah bad pynrung ïa ka met jong u President ha ïing seng ha Mawkhar, Shillong, hashuwa ban rah sha u Lum Jingthang jong ka Seng Khasi Kmie ha Jaïaw.
Kum ka dak ka jingburom ïa une u rangbah, ka jingïalang jong ka Jylli Pyrkhat Kam jong ka Seng Khasi Kmie kaba la long ha ka 16 tarik u Risaw, 2023, ka la shim ïa ka rai ban khang ïa ka Seng Khasi College, Jaïaw bad baroh ki skul kiba hap hapoh ka jingpeit bad jingkhmih jong ka Seng Khasi Kmie ha ka 18 tarik u Risaw, 2023, kaba dei ka sngi lehniam kaba khatduh ïa ka met jong une u rangbah, khnang ba baroh kiba don ha kitei ki jaka pule jong ka Seng Khasi Kmie kin ïoh ban ïashim bynta lang ban leh burom khatduh ïa une u Nongïalam jong ka Seng. Kane ka long katkum ka kyrwoh na u General Secretary, Seng Khasi Kmie, Bah Hainess Marbaniang.
