Tura, Risaw 17
Ka Meghalaya Board of School Education (MBoSE) ka la sdang ïa ka jingrakhe ba lai sngi jong ka jingdap 50 snem ka tnad da ka jingïaid ‘rally’ ki thuk-thuk lyngba ki bynta ka Tura, West Garo Hills (WGH) kaba dei ruh ka ‘headquarter’ jong ka.
Katei ka ‘rally’ thuk-thuk hynne ka step ka long shi bynta jong ki prokram bapher-bapher ba la pynlong ban rakhe ïa ka MBoSE ka ban sa sakhi ruh ïa ka jingdonlang u Myntri ka tnad pule-puthi, u Rakkam Sangma kum u Symbud kongsan bad u Symbud Myntri Rangbah ka Jylla, Bah Sniawbhalang Dhar kum u kongsan ha ka Sngi Balang.
U Myntri Rangbah ka Jylla, u Conrad K. Sangma un ïashim bynta ha ka prokram ha ka sngi khatduh (19 tarik) lem bad ka Kynhun Myntri jong u bad ki dkhot ka GHADC.
Katkum ka jingïathuh ki nongpynïaid, ka jingpynlong ïa ki prokram bapher-bapher ka long ban rakhe ïa ka Jubili Ksiar ka MBoSE kumjuh ban pyni kaei kaba ka tnad ka la leh ha kine ki 50 snem ba la leit.
“Ka jingmut jong kine ki prokram ka long ban pyni bad pynpaw ïa ki thong ba ka tnad ka la kynjoh. Ngi don ïa ki prokram kiba ïadei bad ka pule-puthi, lariti, kam ïalehkai nalor kiwei-kiwei,” la ong u C.P. Marak, ophisar IFS ba la shongthait bad Executive Chairman ka MBoSE. U la bynrap ba ki jingseisoh jong ka tnad kim long tang hapoh ka Jylla, hynrei shabar kumjuh.
Ka MBoSE ka la sdang treikam ha u snem 1973 na i ïing mala barit bad mynta ka la kylla long ka tnad ka ban khmih ïa ki eksamin jong ki kyrdan pule ‘Secondary’ bad ‘Higher Secondary’ jong ka Jylla.
“Mynta ngi la don la ka jong ka jaka ha Tura bad Shillong. Ngi la nang kiew ha ki jingdon-jingem bad ka jingdon ki nongtrei. Na ka jingkhmih ïa 3000 ngut ki khynnah ha u 1973 – mynta sha kumba 1 lak ngut ki khynnah pule. Hadien-habud, kane kan kiew bad ngi dang pynkhreh bad pyntikna ba ngin ïaid ryngkat-ryngkat bad ka por,” u la bynrap.
Haba kren shaphang ka lawei jong ka MBoSE, ki nongpynïaid ki la ong ba ka jingpynleit jingmut jong ka tnad ka long ban pyntikna ba kito kiba ïaid lyngba ki long kiba bit ba biang ban ïaid shakhmat bad ki jingpule ba shajrong ne ban pynleit jingmut ha ki jingpule laiñ kiba ki kwah pyntbit.
“Ki khun samla jong ngi ki dei ban lah ban ïaid ryngkat bad ka ri baroh kawei bad ban tam ruh ïa ki jingseisoh jong ki khynnah pule na kiwei-kiwei ki bynta wat ha ki kyrdan jong ka pyrthei,” la ong u Executive Chairman.
Ka ‘rally’ thuk-thuk kaba la sdang ha ka por 9:15 baje hynne mynstep ka la sakhi ïa ka kynhun ki nongñiah NH -51 lem bad ki khynnah pule na ki 5 tylli ki skul bad nongtrei ka MBoSE kiba la ïaid na ophis ka MBOSE sha Green Haven kaba ha New Tura.
