Shillong, Risaw 17
Ka Meghalaya Peoples Labour Union (MPLU) ha ka Sngi Ba-ar ka la leit ban ujor sha u Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem halor ka jingjyllei jong ki bar jylla kiba khaïi bad kiba trei be-aiñ ha kylleng ki district kiba hap hapoh u pud treikam ka KHADC.
Katkum ka jingujor jong ka Union, ka jingseng kam beaiñ bad ka jingïoh trei laitluid jong ki bar jylla ki long kum ha Byrnihat, ha EPIP, ha 13 Mer bad ha baroh kawei ka Raid Marwet kaba hap ha Ri bhoi District, ha ka shnong Shallang ha kaba ha ki karkhana saiñ rnga dewïong la tyllep da ki bar jylla ki bym don ïa ki kot ki sla kiba biang, ha Ichamati, ha Kalibari, ha Majai bad ha baroh ki shnong khappud jong ka South West Khasi Hills district, ha Borsora, ha Cherragoan bad ha Bagli, kiba hap hapoh ka West Khasi Hills.
Ha kaba ïadei bad kane, ka Union hapoh ka jingïalam jong u General Secretary u Bah B Basaïawmoit ka la aiti da ka jingthoh ha u Bah Pynïaid Sing Syiem ban kyrpad ïa ka District Council ban khynra naphang ïa kine ki jaka ba ki bar jylla ki trei laitluid khlem ki kot ki sla kiba biang bad pynpaw ruh ba ka Union ka long kaba kloi ban ai ka jingïatreilang bad ka Council ha kaba ïadei bad kane ka bynta.
