Jowai, Risaw 17
U Myntri Rangbah ka jylla u Conrad K Sangma u la pynbna paidbah ïa ka skhim kaba kyrpang na ka sorkar jylla na ka bynta ban shna cinema hall ha man kawei pa kawei ka distrik jong ka jylla Meghalaya.
U Myntri Rangbah u la ïathuh ïa kane ha ka prokram CM Elevate ba la pynlong ha District Auditorium, Jowai ha ka sngi Ba-ar jong ka taïew.
U Myntri Rangbah u la ong ruh ba ka skhim na ka bynta ka jingshna ïa ki cinema hall ka long ban pyntikna ba baroh ki distrik ki dei ban don kawei ka cinema hall ïa kiba yn pynïaid da ki kynhun shimet bad ba na ka liang ka sorkar kan long ka nongkyrshan lem.
U Conrad u la ong ruh ba ka donkam ban don ïa ki convention center ha man la ki nongbah jong ki distrik.
Ha kawei pat ka liang, haba ïadei ba ka jingpynneh ïa ka jingjyrngam ha ka mariang, u Conrad u la ong ba kino kino ki nongshong shnong, ki kynhun ne ki riewshimet kiba kwah ban ai jingïada ïa la ki jong ki khlaw ki btap, ka sorkar Meghalaya kan pynïoh ïa ka jingïarap kaba T.15,000 na ka bynta shi hectare ka jingheh ka jaka khnang ba kan ym don ka jingpynthut ïa kine ki khlaw ki btap.
U la ong ruh ba haduh 40,000 hectare ki jaka khlaw ki la don hapoh ki jingai jingïada ne ‘protected areas’ hapoh jong ka PES program, bad na ka liang ka sorkar ka la pynïoh haduh T.40 klur ha ka rukom jong ki cheque bad cash sha ki nongshong shnong ba kin ai jingïada ïa kane manla u snem.
