Jowai, Risaw:
U Myntri Rangbah ka jylla u Conrad K Sangma ha ka Sngi Ba-ar u la plie ïa ka ‘Integrated Programme’ bad aiti ruh ïa ki ‘cheque’ lyngba ka skhim CM Elevate kum ka dak jingpynpaw ïa ka jingkut jingmut ban kyntiew ha ka liang seng kam seng jam bad ka roi ka par ha ka jylla ha ka jingïalang ba la long ha District Library Auditorium, Mynthong, Jowai, West Jaiñtia Hills District.
Ha kane ka prokram la ïadon lang ka Kong Santa Mary Shylla MLA, Sutnga Saipung, u Bah Wailadmiki Shylla MLA Jowai, u Bah Lahkmen Rymbui MLA Amlarem nalor u CEM ka Jaiñtia Hills Autonomous District Council (JHADC) u Bah Thombor Shiwat bad kiwei kiwei.
U Myntri Rangbah haba ai jingkren ha kane ka jingïalang u la ong ba kane ka prokram ka pynpaw ïa ka thong jong ka jylla na ka bynta ka lawei kaba kiew shakhmat ha ka liang ka ïoh ka kot bad ka roi ka par lyngba ka jingpynkupbor sha ki samla ha ka liang ka ïoh kam ïoh jam, ka jingïatylli hapdeng ki nongshong shnong bad ka jinglah ban pynneh pynsah ïa ka jingkhuid jingsuba jong ka mariang.
U Conrad u la ong, “Nga la ju ïai ban ba ki kam pynroi kim long ki bym pat biang lada baroh ki nongshong shnong bad ka imlang ka sahlang ha ka jylla kim pat lah ban ïaid shakhmat ryngkat lang ha ka liang ka ïoh ka kot bad ka roi ka par. Ka CM Elevate ka dei ka prokram na ka bynta ban ïarap ïa ki nongseng kam seng jam lajong, bad ha kine ki san snem kiba la dep ngi la lah ban kyrshan haduh 3000 ngut ki nongseng kam lajong ha kiba bun rukom.”
Shuh shuh u la ong ruh ba ka jingkyntiew ïa ka ïoh ka kot bad ka jingpynkup bor ïa ki kynthei ka long kaba kongsan, bad ki self-help group ki dei kawei na ki lad ba khraw bor ki ban aibor bad kyntiew ïa ka ïoh ka kot hapdeng ki kynthei. Ha kaba ïadei bad ki prokram ka YESS Meghalaya, u Conrad u la ong, “Na ka liang ka sorkar kan ai ïa ka jingkyrshan kaba haduh T.1 lak na ka bynta ban leh bad seng ïa kino kino ki kam.
“Napdeng ki 1155 ngut ki samla kiba ngi la ai jingkyrshan ha ka kylla kaba nyngkong ïa ka kynhun ba nyngkong ha ka jylla, ha kaba tang ka Jaiñtia Hills ka la don haduh 389 tylli ki kynhun kiba la ïoh jingmyntoi; kata kaba mut ha ka jylla baroh kawei ka Jaiñtia Hills ka la ïoh ïa ka jingkyrshan kaba bun eh lyngba ka YESS Meghalaya. La sam haduh kumba T.1 klur hapdeng kine ki kynhun,” la ong u Myntri Rangbah.
Hadien kane ka jingïalang u Myntri Rangbah ka jylla u la leit jurip ïa ka Kiang Nangbah Government College, Jowai bad kumjuh ruh ïa ka Jowai Civil Hospital ha Ïalong.
