Shillong, Risaw 18
Hadien ka jingleit jngoh dalade ïa ka Civil Hospital ha Tura bad Jowai, u Myntri Rangbah, Conrad K Sangma, ha ka Sngi Balang u la lum ïa ka jingïalang bad ki heh ka tnat ka koit ka khiah bad u la bthah ïa ki ban pynsted ïa ka jingpynrung kam thymmai ïa ki nongtrei ha kine ki Hospital.
Ha kajuh ka por, u Conrad u la bthah ban buh da ka bording kaba thikna ha Jowai, Tura, bad Shillong Civil Hospital khnang ba kin lah ban treikam baroh 24 kynta khlem jingeh.
Nalorkata, u la ong ba dei ban buh ïa ki jaka leit bar kiba paka ha baroh ki hospital jong ka sorkar.
Na ka liang ki heh ka tnat ki la pynpaw ïa ka jingdonkam ban don ki tiar ki tar, jingdonkam na ka bynta ki doktor bad ki nongtrei bad ban pynkiew ïa ka rukom treikam ha kiba bun ki liang. Halor kine, u Conrad u la ong ba ka sorkar kan sa nang peit bniah.
