Shillong, Risaw 18
Ka NEHU Teachers’ Association (NEHUTA) ha ryngkat ka jingïasnoh -ktilang bad ka NEHU Non-Teaching Employees Association (NEHUNSA) ki la mih shakhmat ban thaw da ka Joint Action Committee (JAC) ban pyllait ïa ka North Eastern Hill University (NEHU) na ki kam be-aiñ jong u Vice-Chancellor (VC), Prof. P.S. Shukla.
“Ka NEHUTA, da ka jingsngewkhia na bynta ka lawei jong ka NEHU bad kumjuh jong ki lak ngut ki samla pule hapoh ka Four Year Under-graduate Programme (FYUP) ka bym pat mynjur haduh mynta ka la pynïasnohlang ïa ki mat bad ka NEHUNSA, ban mih shakhmat bad kawei ka kynhun – Joint Action Committee (JAC),” la ong ki nongïalam ka JAC hapoh ka jingïalam u Prof. Lakhon Kma kum u Chairman ha ka kyrwoh khubor.
Ka komiti ka la ong ruh ba da kaba bud ïa ka rukom synshar ba riewspah jong ka NEHU haba ïadei bad ka jingkyrpad na bynta ka hok bad ka jingbym noh shiliang, la thaw ïa ka JAC katkum ka Riti Synshar jong baroh ar kynhun – ki nonghikai bad ki nongtrei (ki bym hikai) ha ka jingïalang kaba la long dang shen, bad baroh ki mat kiba don kajuh ka jingsngewkhia la pynhap hapoh ka jingkhmih jong ka komiti.
“La khmih lynti ba kiwei-kiwei kiba don ka jingsngewkhia kum ka MeTTA-NEHU, MCTA, NEHUSU lem bad kiwei-kiwei ki kynhun seng samla, imlang-sahlang bad ki kynhun ba ïadei bad ka lariti kin pynïasoh ban pynduna ïa ki jingbym biang kiba la leh da u VC khnang ba ka lawei jong ka skulbah kan ym shah ktah na ka jingbym biang bad ki kam be-aiñ jong u VC da kaba pynkheiñ ïa baroh ki rukom, kyndon bad nongrim kiba la kyntiew ïa ka NEHU ha kine ki 50 snem ba la dep,” la ong ki nongïalam ka komiti.
Ka JAC ha ka jingïalang kaba la long ka la ïakren halor ki mat kum ka jingpynkheiñ ïa ka NEHU Act, 1973 la bunsien lem bad kiwei-kiwei ki jingpynkheiñ kyndon.
“Ka jingthmu kaba hakhmat ban leh donbor, kuman bad eh dohnud na ka liang u VC ka shong ha ka bym bud ïa ka jingstad ba kyllum jong ki kynhun ba la shah jied tang ban shakri ïa ka jingsngew khraw da kaba ïaid pyrshah ïa baroh ki kyndon jong ka skulbah,” la ong ka komiti.
Ka la ong ruh ba ka kynhun treikam ba mynta jong u Prof. P. S. Shukla ka dang shu sdang pynkheiñ bad shen, kumba baroh ki kam be-aiñ ki ïalam, ka la lam sha ki jingpynkheiñ kiba khraw ha ka jingpynïaid kam bad ki kam ba ïadei bad ka pule-puthi jong ka skulbah.
Da kaba buh jingmut ïa kane, ka JAC ka la lum thup ïa ki mat kum ka jingpynkheiñ ïa ki aiñ, jingpynkheiñ ïa ka bor ba dei khmih ka skulbah kum ka Academic Council, bad kiwei-kiwei, ka jingbym bud ïa ki rukom long jong ka skulbah, ka jingbym treikam jong ki tnad treikam ka skulbah kum ki ‘Health Centre’, ‘Laboratory’, bad kiwei-kiwei, ka jingpynslem ban thung kam ha ki kyrdan ‘Registrar’ bad ‘Finance Officer’ lem bad kiwei-kiwei ki ophisar kum u ‘University Engineer’ bad Director-College Development Council.
Ka JAC ka dawa kyrkieh ban pyndap noh ïa baroh ki jaka bathylli jong ki nongtrei (bym hikai) khnang ba ka jinglong-jingman ba mynta haba ïadei bad ka jingtreikam jong ka skulbah yn lah ban weng noh kumjuh ban shimkhia haba phai sha ki kam ba ïadei bad ka bamsap.
“Ka JAC ka la rai ruh ban sdang ha ka ban leh eiei mardor katkum ka jingkongsan jong ki mat kum ka jingkhot kyrkieh ïa ka jingïalang ka ‘Academic Council’ ban ïakren halor ka FYUP ha ki kolej ba pynïasoh sha ka NEHU, ban weng ïa u Rohit Prasad hapoh shi taïew; uba la shah thung ha la ka mon da kaba pynkheiñ ïa baroh ki kyndon da une u VC bad ka jingai ïa ka song pisa kaba heh nalor kiwei-kiwei ki jingmyntoi; ban bujli ïa u Section Officer na ophis u VC bad ban ïaid shakhmat bad jingdawa ba ym dei ban pyndonkam ïa ki nonghikai bad ki nongtrei (technical) na bynta ki kam ‘administrative’,” la ong ki nongïalam.
Namar kata, ka JAC ka kyrmen ba une u VC un pynbeit ïa ka lynti ïaid ba bakla bad ban wanrah biang ïa ka skulbah ha ka lynti kaba dei katkum ka NEHU Act.
