Nongstoiñ, Risaw 18
Ka jingdon jong ki skul sorkar ha man ki shong bad ki dong bapher bapher jong ka West Khasi Hills ka la long ka jingkyrkhu bad jingmyntoi haduh katta katta ïa ki khynnah ba kin ïoh ïa ka jinghikai bad ka jingnang jingstad. Pynban ha kawei ka liang ka long pat kaba isangsot ban ïohi ba hapoh kane ka district ki dang don ki skul sorkar ki bym biang naba wat tang ka ben shong ne ka miej pule kim don.
Ka Government LP School Pyndengkirit, ka dei kawei na ki skul kaba hap hapoh ka Mawshynrut Civil Sub Division, kaba lah ban ong ba la isangsot haba peit namar ka jingduna jong ki ben shong bad ki miej thoh. Ki khynnah kane ka skul ki la hap ban shong ha madan ha ka por shim klas.
Ïa kane la lap da ka Khasi Students’ Union (KSU) Mawshynrut Circle kaba la hiar ban jurip ïa katei ka skul hadien ka jingïoh ujor na ki kmie ki kpa jong ki khynnah katei ka skul.
Ki nongïalam ka KSU Mawshynrut ki la ong ba ha katei ka jingjurip la lap ïa bun ki jingduna, kum ki ben shong bad ki miej thoh ha kaba ki khynnah ki la hap ban shong ha madan ha ka por shim klas bad kaba la isangsot shisha.
Ki la ong ruh ba katei ka skul kam ïoh ïa ka jingbam sngi (mid day meal) naduh u snem 2017 haduh mynta u snem (2023) bad ki nongshet kim shym ïoh jingsiew bad kane ka pynlyngngoh haduh katta katta ïa ka KSU.
Nalorkata, ki la ong ruh ba ka KSU ka la lap ba ka ïing skul kam biang, ka ïing shet ja, ka um bad ki paiñkhana bad ha ka jingïakren jong ki nongïalam ka KSU bad ki nonghikai, ki la ïathuh ba wat ïa ki jingdonkam jong ki khynnah skul la hap ban pynbiang da ki nonghikai.
Shuh shuh halor katei ka bynta, ha ka Sngi Balang ka KSU Mawshynrut Circle lyngba ka Education Cell ka la leit ban ïakynduh ïa ka Sub-Divisional School Education Officer (SDSEO) West Khasi Hills District ban pynsngew ïa katei ka jingeh jong ka skul.
Ka KSU ka la ïathuh ruh ba ha katei ka jingleit ban ïakynduh, ka SDSEO ka la kular ban buddien ïa katei ka kam khnang ba ki khynnah kin nym duhnong ïa kaei kaba ki dei ban ïoh.
Ha kajuh ka por ka KSU ka la kyntu ruh ïa ki nongpynïaid ka skul ba kin pynïaid bad shakri hok la ka kamram khnang ba kan nym don ka jingduhnong ïano-ïano ruh.
