Shillong, Risaw 18
U President ka Sengbah ki Nongshat Nongkheiñ Hynñiewtrep Hynñiewskum kaba don ïa ka jaka lehniam ha Baniun, Upper Shillong, Bah Pran Jala u la ïathuh ba ka jingdon u thlen ha ka jaidbynriew hynñiewtrep ka dei namar ki don ki longïing kiba kwah rhah spah ki pan shi pan ïa ka phan ka kyrpad.
U la ïathuh ba ha ki longshwa manshwa ki thliew ïing ki ju don kata ka phan ka kyrpad ban pan jingkyrkhu ïa ka ïing ka sem hynrei ki don pat ki longïing kiba la lalot spah ki pan shi pan haduh ba un kylla ksuid bad kylla thlen. Kumta haba kim lah shuh ban bret kato ka ïing jong ka kur ne ka jait ka hiar pateng haduh mynta.
Nalor nangta, u la batai ba ka jingkhap ïa ki jaiñ ki shñiuh ka dei ba ka jingkhap hi u thlen khamtam kito ki briew kiba ju ïajuh ïajan bad kito ki ïing kiba la hiar pateng u thlen.
“Shisien ba u briew uba ngat ha ka shah khap thlen, lada u briew u dang shitom ne u dang lah ban ïaid ban ïeng ngi dang lah ban loit ne law hynrei ïa uto u briew uba la ïoh bam lut ngim lah shuh” u la ong.
U Bah Pran Jala u la ïathuh ruh ba kito ki longïing kiba hiar pateng u thlen lada kim lah ban pynbiang briew ki shah pynkhlemraiñ da kaba mih u bseiñ, ka miaw baheh hajrong tnum, nangta ka mih ka dohkha ha phyllaw hynrei lada ki la pynbiang briew um lei-lei shuh.
Shuh shuh u la ïathuh ba kito ki longïing ki bym pynbiang briew ïa u thlen un sa bamduh ïa kato ka ïing da kaba pynïoh tang ki khun shynrang bad kin die lut ki jaka puta.
“Haduh mynta ki dang don kiba ri thlen, ngi tip lada don ki briew kiba wan phah duwai ha ngi hadien ba ngi la leh da ka pylleng” u la ïathuh.
Ha kajuh ka por u la ïathuh ba lada don ki ïing kiba dang ri thlen lada ki kwah ban pynduh jait noh ki hap ban mih haba shit haba shai ka sngi ban tip lut ka pyrthei bad hangta yn lah ban khet ne daiñ ïa u thlen.
U la batai ba shisien ba dang don kiba ri thlen dang don kiba leh menshohnoh namar u menshohnoh u kem ïa u briew tang uba jem rngiew namar u ïohi kum ka sim. Hynrei, ïa u briew uba ehrngiew lada dei khyllung, khynnah ne kynthei um nud ban kem namar u ksuid u tieng kylla.
U la batai biang ba ka jynjar bha ban kem ïa u menshohnoh namar la ïada da u ksuid namar u menshohnoh u mareh sha riat, u jam ïa ka wah bad u rynsied katba lap.
