Jowai, Risaw 18
Katkum ka hukum, ka National Commission for Protection of Child Rights (NCPCR) ryngkat bad ka tnat Narcotics Control Bureau (NCB) ki la pynkhreh bad pyllait paidbah ïa ka Joint Action Plan on Prevention of Drugs and Substance Abuse among Children and Illicit Trafficking.
Kumta ka long kaba donkam ban peitngor na ka bynta baroh ki dukan die dawai ne pharmacy hapoh ka district kiba die ïa ki dawai ba hap hapoh ki Schedule H bad X Drugs.
Kumta u DC u la pyntreikam da ka Section 133 CrPC 1973 ban bthah ïa baroh ki dukan die dawai ha West Jaiñtia Hills kiba die ïa ki dawai kiba hap hapoh ka Scheduled X ne H Drugs katkum ka kyndon 65(9) (a) ka aiñ Drugs & Cosmetics Act, 1940 ban pyndait CCTV Camera hapoh dukan lane ha bar dukan.
La ai por ruh shi bnai ïa ki trai dukan die dawai ban pyndait ïa ka kor CCTV. Ïa ki dur ki dar lyngba kine ki kor ringdur lah ruh ban jurip da ki heh jong ka tnat District Drug Controller Authority/Child Welfare Police Officer ha kano kano ka por.
Lada jia ba ki trai jong kine ki dukan die dawai ne pharmacy kim pyntreikam ïa kane ka hukum, na ka liang ki tnat ba dei khmih kin shim ïa ki lad jingpynshitom.
