Shillong, Risaw 18
“Hato ngi long kiba khuid tang ha ka shi sngi jong ka taïew, bad ha kiwei ki sngi pat ngin long pop ne bym khuid shuh. Ngi dei ban sngewthuh ba ka ‘Sngi ba Khuid’ ka dei ban long man la ka sngi,” la ong u Bah Paul Lyngdoh uba dei u Myntri ka tnat Kam Jngohkai ka Jylla.
Haba kynthoh halor ka jingmih jingpyrshah ban pynkut ïa ka tamasa Cherry Blossom ha ka Sngi U Blei, kumba la paw ka jingpyrshah ba la pynmih da ka seng Saiñdur Tipkur Tipkha Ehrngiew Hynñiewtrep (STIEH), u Bah Paul u la ong, “Kam mut ba u briew un long khuid tang ha kawei ka sngi, katba ha kiwei pat ki sngi un nym long khuid ne long pop noh.”
Lah ban kdew ba ïa ka Shillong Cherry Blossom Festival yn pynlong ha Bhoirymbong bad yn sdang naduh ka 17 tarik Naiwieng kaba dei ka sngi Thohdieng ka ban pynkut ha ka 19 tarik Naiwieng kaba dei ka Sngi U Blei.
Haba kylli aïu u don ban ong ne kynthoh halor ka jingpyrshah jong ka STIEH ïa ka jingpynkut ïa katei ka tamasa ha ka Sngi U Blei, u Myntri u la ong ba um don eiei ban kren hynrei u la shu ong ba baroh ki dei ban tip ba man la ka sngi ka dei ka sngi ba ‘Khuid’ bad ba kyntang bad kam mut ba ki briew ki kylla long ‘khuid’ bad ‘ngeit Blei’ tang ha kawei ka sngi jong ka taïew (Sngi U Blei) bad kylla pop biang ha kiwei pat ki sngi jong ka taïew.
“Ngam don eiei ban kren ne kynthoh namar ngi dei ban sngewthuh ba man la ki sngi ki dei ki sngi khuid bad ba kyntang ym tang kawei ka sngi ha ka taïew,” la ong u Myntri.
