Tura, Risaw:
Ki nongshong shnong ka Chokpot, South Garo Hills ha ryngkat ki kynhun seng bapher-bapher napoh ka thaiñ ha ka Sngi Ba-ar ki la pynlong ïa ka jingïaid paidbah ban pyrshah ïa ka jingtih maw kaba treikam ha Budugre, hajan ka Wah Dareng.
Ki ‘riew paidbah, Nokma bad Sordar napoh ka thaiñ, kumjuh ki khynnah skul ki la ïashim bynta ha katei ka jingïaid paidbah hapoh ka jingïalam ki kynhun seng ba kynthup ïa ka GSU, Chokpot Area Vigilance Committee (CAVC), FKJGP, AHAM, AYWO, GSMC, Nokma Council nalor kiwei-kiwei.
Ka jaka tih maw ha Budugre, kumba la kam da ki nongshong shnong ka long kaba be-aiñ bad ka la treikam naduh u snem 2021. Namar ki jingpyrshah na ki nongshong shnong bad ka jingpynbor na ka liang u paidbah, katei ka kam ka la sangeh katto-katne por ha u 2021 hynrei ka la sdang biang mynta u snem.
Hashuwa, la phah ïa ki jingujor sha u SDO bad SDPO halor katei ka kam. Na ka liang ki nongshong shnong ki la ïakynduh ruh ïa u Myntri Rangbah, Conrad Sangma, MP ka Tura, Agatha Sangma kynthup u MLA, Sengchim N. Sangma bad aiti ruh ïa ki dorkhast ban dawa phah khang ïa katei ka kam.
Ha kajuh ka por, ka la don ruh sa kawei ka jingujor kaba la aiti ha ka Sngi Ba-ar hadien ka jingïaid paidbah.
Ka jingïalang ka la maham ruh ban nang pynjur ïa ka jingïakhih lada ai lad ïa katei ka jaka tih maw ba kan bteng.
