Tura, Risaw 18
U Symbud Myntri Rangbah ka Jylla, Bah Sniawbhalang Dhar ha ka Sngi Balang u la long kum u kongsan ha ka jingrakhe Jubili Ksiar jong ka Meghalaya Board of School Education (MBoSE), Tura ha ka jingïalang kaba la long ha Green Haven, New Tura.
Ka jingïalang ka la sakhi ïa ki jingpynbyrngia bapher-bapher ba kynthup ïa ki prokram ba ïadei bad ka lariti bad ka jingpynkynmaw ïa ka jingïaid lynti ba 50 snem jong ka tnad.
Ka phang jong ka jingrakhe ka long, “Celebrate the Past, embrace the present and rise to the future”.
Haba ai jingkren ha ka jingïalang, u Symbud Myntri Rangbah ka Jylla, u la pynpaw ka jingsngewnguh halor ki jingseisoh ka tnad ha kine ki 50 snem ba la dep bad ong ba ka MBoSE ka long kawei na ki ‘Board’ kaba biang tam hapoh ka ri.
Ha kajuh ka por, u la kdew ïa ka jingkongsan bad jingkiew jong ka pule-puthi hapoh ka thaiñ wat hapdeng kiba bun ki jingtynjuh. Ka tnad ha kawei ka liang ka la kyntiew bad pynpaw ka jingkyrmen ba kin dang don bun shuh ki jingseisoh ki ban dang wan hadien-habud.
U Symbud Myntri Rangbah u la ai jingïaroh ïa ka jingïashim bynta jong ki khynnah na ki skul bapher-bapher bad pynpaw ka jingsngewnguh sha baroh ki ophisar bad nongtrei halor ka jingtrei minot jong ki na bynta ka bha ka miat jong ki nongshong shnong ka thaiñ.
U Myntri ka tnad pule-puthi, u Rakkam A. Sangma, uba long kum u Symbud kongsan ha ka jingïalang u la ai khublei ïa ka MBoSE kaba la kynjoh ïa une u mawmer. U la pynpaw ruh ka jingsngewnguh na bynta baroh kito kiba la synñiang sha ka tnad ha kine ki 50 snem ba la dep.
Ha kajuh ka por, u la pynkynmaw halor ka jingsdang jong ka tnad ha Tura, Garo Hills, kaba long ka sienjam kaba khraw ha ka liang ka roi ka par kaba la ïaid ha ryngkat ka jingïoh Jylla lajong ka Meghalaya. U la ong ba ka jingwanrah ïa ka MBoSE ha Tura ka long ka jingkyrkhu ïa ki nongshong shnong ka Ri-lum Garo bad ka Jylla hi baroh kawei.
Ha ka ‘Powerpoint Presentation’, u Controller of Examinations, MBoSE, Tura, u T. R. Laloo u la kdew ïa ka lynti ïaid jong ka tnad naduh ba la seng ïa ka. U la pynkynmaw ruh ïa ka jingpynlong aiñ ïa ka Meghalaya Board of School Education Act ha u snem 1973.
Ïa ka eksamin High School Leaving Certificate (HSLC) ba nyngkong eh la pynlong ha u snem 1973, ha kaba 3797 ki kyrtong ki la ïakhun katba ka jingdon kiba ‘pass’ ka long 38.3%. Ha u 2023, ka jingdon kiba ‘pass’ ka la kiew sha ka 78%.
Kham ha shuwa, u kongsan u la pynher ïa ka lama jong ka MBoSE, kum ka dak ka jingsynñiang jong ka tnad ha ki bun-bun snem ba la leit noh. Nalor kane, ka la don ruh ka jingthang ïa u Dongmusa/Bilcham, ka jingpyllait ïa ka ‘Souvenir’ da ki heh ki haiñ bad ki prokram ba ïadei bad ka kolshor ba la shim bynta da ki skul bapher-bapher ka Ri-lum Garo.
