Shillong, Risaw 18
U President ka United Democratic Party (UDP), Bah Metbah Lyngdoh u la ong ba haduh mynta na ka liang ka seng kam pat rai ïano-ïano ruh ban long kyrtong sha ka ilekshon MP ne ban rai halor ka ilekshon MDC ha u snem 2024.
“Shen ngin sa sdang ban ïa pyrkhat haba ïadei bad ka ilekshon MP sha Lok Sabha bad ka ilekshon MDC, ïa mynta hi ngim pat rai ïano-ïano ruh,” la ong u Bah Metbah haba kren sha ki lad pathai khubor ha ka Sngi Balang haba kylli halor ka jingpynkhreh ka UDP ïa kitei ar tylli ki ilekshon ban long ha u snem 2024.
“Hooid, ki la don 2 ngut kiba la wan shakhmat ban pynsngew ha ka seng ba ki kloi ban ïakhun ïa ka ilekshon MP ka ban long ha u snem ban wan na ka UDP na Shillong Parliamentary Seat,” la ïathuh u Bah Metbah bad bynrap ba ka long kaba sngewtynnad ba kin don ki rangbah kiba kwah ban ïakhun ïa ka ilekshon MP na ka UDP.
Halor ka jingpaw kyrteng u MLA barim ka Mawlai u Bah Process T Sawkmie, uba la pynpaw ba u kloi ban ïakhun ïa ka ilekshon MP lada ka seng ka ibit bad ai tiket, u Bah Metbah u la ong ba haduh mynta ka seng kam pat shong ne ïakynduh ban shim ïa kano-kano ka rai.
