Shillong, Risaw 18
Ka Central Puja Committee (CPC) hynne ka sngi ka 18 tarik u Risaw ka la pynlong ïa ka prokram jingïakynduh lang jong baroh ki kynhun niam napoh ka jylla na ka bynta ban wanrah shongsuk shongsaiñ kaba la long ha Meghalaya Hindu Mission Sarbajanin Durga Puja Committee Pandal (MHMSDPC), Mawprem.
Ha katei ka sngi la ïoh ïa ka jingkren pdiang na u Partha Sarathi Choudhury, Working President ka MHMSDPC, ka jingduwai lang da baroh ki nongïalam niam jong ka All Faith & Religion ba la ïalam da u Swami Divya Swarupananda Maharaj ka Ram Krishna Mission, Shillong.
Haba ai jingkren ha katei ka sngi, u Bah Paul Lyngdoh uba dei u nongmihkhmat katei ka thaiñ bad kum u Myntri ka Sorkar Jylla, u la ong ba kum ki riewngeit ki don ha ki lynti ïaid bad ki kynhun niam bapher bapher hynrei baroh ki don ïa ka jingngeit ka jong ki, bad u la ong ba u ngeit skhem ba kane ka jingïadei jong ki kynhun niam bapher bapher kan dang ïai long kaba skhem bad ka ban dang don jingïadei.
U Bah Paul u la ong ruh ba kum ki nongïalam jong ki kynhun niam ka long ruh kaba donkam ban shimkhia bad ïatreilang ban pyndum pyndam ïa kiwei pat ki jingjia bad ki jingsniew kiba don hapoh kane ka jylla khamtam ha kaba ïadei bad ka jingjur bad ka jingkhaïi ïa u drok hapoh ka jylla kaba la pynjot shikatdei eh ïa ki samla ka jylla namar ba ka sorkar kam lah satia ban treikam marwei ban ïakhun ïa u drok.
Shuh shuh u Bah Paul u la ong ba kam don jingmyntoi lada ka sorkar ka wanrah ïa ka roi ka par kiba bun lada ngim lah ban ïatei para briew.
“Ngi pan ka jingkyrshan na iwei-pa-iwei na phi ba phin ai ka jingïatreilang bad ban pyntikna ba baroh ki ïingmane ne ki jaka mane blei ba kin shim ïa ka jingkut jingmut ba ym tang ba kin nym pyndonkam ïa ki jingdih pynbuaid ne u drok hynrei ban ïakhun bad ïaleh pyrshah ïa u drok”, la ong u Bah Paul.
Na ka liang u Most Rev. Purely Lyngdoh, u la ong ba baroh ki niam ki don ka jingngeit ba u Blei u dei u nongthaw uba la thaw ïa ki khun bynriew bad u la ong ba ka shongsuk shongsaiñ ha ka pyrthei baroh kawei nyngkong eh ka wan na u Blei.
“Ha ka imlang ka sahlang, ngi don ïa shibun bah ki kynhun bapher bapher kiba sah lang hajuh bad ki kynhun riewngeit bapher bapher kiba don lang hajuh, ngi lah ban don ka imlang ka sahlang kaba itynnad, kaba skhem, kaba don ka roi ka par bad kiwei kiwei ki bynta bapher bapher ban ïatreilang hajuh, ban don don ka jingsngewthuh lang bad ban ïatei iwei-ïa-iwei”, la ong u Most Rev. Purely Lyngdoh. Ha katei ka sngi la ïoh ruh ïa ka jingrwai na ka CPC Women Wing, ka jingshad na ki dkhot jong ka DPC bad kiwei kiwei.
