Shillong, Risaw 18
Ka skul Seiñ Raij Secondary School, Lower Mawprem Shillong hynne ka sngi ka 18 tarik u Risaw ka la pynlong ïa ka prokram pynkupburom ïa ki khynnah pule jong ka snem 2020-2022 kiba la pas bad leh bha ha ki eksamin jong ki.
Ha katei ka sngi u kongsan u dei u Bah Sunny Mawlong uba dei u Managing Director of Hundredfold Academy, Immanuel Coaching Academy and Mount Olive Culinary & Hospitality, Management.
La ïoh ruh ïa ka jingkren na ka Principal jong ka skul, ka Kong GN Lamare, ka jingkren na u dkhot ka Managing Committee ka skul, u Waheh Belbin Kyndiah, ka jingduwai na ka Kong Savitri G. Laloo bad ka jingai khublei na ka Kong Rani War.
Ha katei ka sngi ka skul ka la pynkupburom ruh ïa kawei ka nonghikai jong ka skul kaba la ai jingshakri kumba 25 snem. Ha katei ka sngi la ïoh ruh ïa sur jingpynbyrngia na ki khynnah skul bad ka jingshad na ki khynnah rit.
Na ka liang ka Principal, ka Kong GN Lamare ka la pynpaw ka jingsngewkmen kaba khraw bha ïa baroh ki khynnah skul kiba la trei shitom bad kiba lah pas bha ha ki eksamin jong ki.
Haba ai jingkren ha katei ka sngi kum u kongsan, u Bah Sunny Mawlong u la ong ba bun ki khynnah ki don ïa ka jabieng kaba rit bad ki ju pynsngew bha ïalade ba ki wan na ka skul kaba rit kumta kim lah ban leh eiei, ne ba ki wan na ka longïing longsem kaba kumne-kumtei bad ba kim lah ban kren phareng bha ne kino-kino ki daw bad kane ka la pynsahdien bad pynsahkut ïa ki khynnah samla shadien.
“Lada phim don ka thong ha ka jingim, ka long kum uto u briew u bym don ka jingkyrmen ha ka jingim”, la ong u Bah Mawlong.
U Bah Mawlong u la ong ba ha ka por jong ki khynnah samla mynta ki la don shibun ki lad ki lynti kiba la plie na ka bynta ki khynnah samla ba kin leh bad trei lada kim long kiba tbit ha ka liang ka pule ka puthi.
