Shillong, Risaw:
Ka Khasi Students’ Union, East Jaiñtia Hills District Unit (KSU-EJHDU) ka la phah dorkhas sha u Regional Director ka National Institute of Open Schooling (NIOS) ban kyrpad pynlong ïa ka ‘Enrolment Drive’ bad ka prokram ai jinghikai hapoh ka distrik.
“Ka jingplie lad na bynta ka pule-puthi kaba paka ka long kaba donkam na bynta ka roi ka par ha baroh ki liang bad ka lawei ba phyrnai jong ki ‘riewshimet kiba shong ba sah ha kano-kano ka thaiñ. Hynrei kaba sngewsih ka long ba ka East Jaiñtia Hills ka ïakynduh ïa ki jingeh bapher-bapher ha ka liang ka pule-puthi, khamtam na bynta ki khynnah ki bym ïoh lad ban leit skul,” la ong ki nongïalam ka seng ba kynthup ïa samla Emmon Chyrmang, Education Secretary bad samla Sanatomba Bamon, Assistant Educational Secretary, KSU-KJHDU ha ka dorkhas ba la phah sha u Regional Director ka NIOS.
Haba phai sha katei ka liang, ki nongïalam ka seng ki la ong ba ka NIOS ka lah ban shim ïa ka bynta kaba kongsan haba ïadei bad kane.
Ka seng ka la ong ruh ba kumba la sngewthuh shai ba ka NIOS ha ryngkat ka jinglong kylluid bad ki sienjam ban kynthup lang jong ka ha ka pule-puthi ka lah ban pynmyntoi shi kat dei ïa ki khynnah pule jong ka distrik.
Ka la ong ruh ba da kaba pynbiang ïa kawei pat ka lad ha ka pule-puthi, ka NIOS ka lah ban kner sha kito ki khynnah ki bym lah ban leit skul namar ki daw bapher-bapher la ka long ha ka jingjngai, ïoh ka kot, daw shimet bad kiwei-kiwei.
“Kumta, ngi kyrpad ïa phi ban pynlong ïa ka jingpynrung kyrteng ne ka ‘Enrolment Drive’ bad ka prokram ai jinghikai hapoh East Jaiñtia Hills. Kane ka sienjam kan long kaba manbha ha ka ban pynsaphriang jingtip sha ki nongshong shnong, ki kmie ki kpa bad ki khynnah lem bad kiwei-kiwei halor ki jingmyntoi bad ki lad ki lynti kiba don lyngba ka NIOS,” la ong ki nongïalam.
Ka seng ka la kdew ruh ba ki bynta ba kongsan jong katei ka prokram kin kynthup ïa ka jingpynsaphriang jingtip halor ka NIOS bad ka jinglong kylluid jong ka ha ka pule-puthi kaba ka tyrwa.
Ha kajuh ka por, ban weng ïa ki jingpynsngewthuh bakla ne ki jingwit kiba don bad ka ‘Distance Learning’ bad ka ‘Curriculum’ ka NIOS kumjuh ban ai mynsiem ïa ki kmie ki kpa ban pynrung ïa la ki khun ki kti ha ki prokram jong ka NIOS khamtam kito kiba mad jingeh ban pynïasoh ha ki skul nalor kiwei-kiwei.
Ka seng ka kyrpad ruh ïa u Regional Director na bynta ka jingkyrshan ha ka ban pynbiang ïa ki jingdon-jingem, ki tiar ba ïadei bad ka pule-puthi lem bad kiwei-kiwei ki lad jingkyrshan na bynta ka jingseisoh haba ïadei bad ka jingpynrung kyrteng bad ka prokram ai jinghikai.
“Kumba phi tip ba ïa mynta ka Examination & Study Centre kam pat don ha East Jaiñtia Hills bad kumta ki khynnah pule kiba la pynrung na bynta ki jingpule bapher-bapher ki hap ban leit sha kawei pat ka distrik, ha kawei ka liang kaba buh jingeh ïa kito kiba na ki jaka ba jngai bad khamtam kito kiba duna ka ïoh ka kot ban wan thoh ïa ki eksamin. Kumta ngi kyrpad ïa phi ban sdang noh ïa ka Examination & Study Centre hapoh ka distrik,” bynrap shuh shuh ka seng.
