Shillong, Risaw 18
Ka soskular kaba la soi ha u snem 2007 ban thied bording ilektrik ka Jylla na ka National Thermal Power Corporation (NTPC) ka la pynkit ram ïa ka Sorkar Jylla bad ïa ka Meghalaya Energy Corporation Ltd (MeECL) kaba la hap ban shu siew ïa ka pisa sha ka NTPC da ki spah klur tyngka wat haba ym shym la shim bording na kane ka kompani.
Tang namar kane ka soskular, ka Sorkar Meghalaya mynta ka hap ban siew sha ka NTPC haduh 664 klur wat hadien ba la dep teng 244 klur.
Haba kren sha ki lad pathai khubor hadien ka jingïalang jong ka Kynhun Myntri, u Myntri ka tnat Bording u AT Mondal u la ong banyngkong ka pisa kaba dei ban siew sha ka NTPC ka dei 488 klur tyngka bad la dep shiteng kata, 244 klur tyngka lyngba ka ram kaba ïoh lyngba ka Atmanirbhar Scheme ha u snem 2022.
Hynrei ka pisa kaba dang dei ban siew sha ka NTPC mynta ka la kot sha ka 664 klur tyngka bad la dep ban ïakren bad ka NTPC ban siew shwa 565 klur tyngka ha ki 20 sien siew. Lada kheiñ ïa ka T.565 klur ha ki 20 sien siew, kan poi T.28.25 klur ha ka sien siew banyngkong.
“Ngi dang don ha ka jingïakren haba ïadei bad ka rukom siew ïa ka pisa sha ka NTPC,” la ong u Mondal.
Kumta u Mondal u la ong ba namarba ka MeECL ka kyrduh pisa, hap ban phai sha ka Sorkar Jylla ban ai jingkyrshan, bad ka Kynhun Myntri ka la mynjur ba ïa kane ka pisa yn siew sha ka NTPC.
U la ïathuh ba na ka T.664 klur, ka NTPC ka la map noh kumba T.100 klur bad dang hap ban siew sa kumba T.565 klur kynthup ïa ka sut bad kiwei kiwei ki jingoh dor.
