Shillong, Risaw 18
U Myntri ka tnat Bording ka Jylla, u A T Mondal u la ong ba ym donlad shuh ban lait na ka soskular thied bording kaba ïateh bad ka National Thermal Power Corporation (NTPC) naduh u snem 2007 namarba ka Ïingbishar ruh ka khlem pynmih ïa ka rai kaba pynksan.
U Mondal u la ong ba ka Jylla ka la leit sha Ïingbishar ban pyllait noh ïa ka Jylla na ka soskular kaba la soi bad ka NTPC naduh u snem 2007 hynrei ym shym la ïoh kano-kano ka jingpynjynsur ne ban lait noh na ka Power Purchase Agreement (PPA).
U la ong ba shisien ba ka soi ïa ka soskular, ka dei ka rai lang na baroh arliang kynhun bad ym lah ban shu pynkylla ïa ka soskular kaba la dep ïa mynjur.
U Mondal u la ong ba kaba shu kham sting ka dei ba ka NTPC ka la map kumba T.100 klur na ka T.664 klur ka ram kaba dang sah, bad kaba dei ban siew mynta ka long kumba T.565 klur. U la ong ruh ba wat ka sut ruh ka lah ban kham duna noh.
Kane ka soskular kan neh 25 snem bad ka sdang ban treikam naduh u snem 2017 naduh ka por ba sdang treikam ka Unit kaba khatduh jong ka NTPC.
Ha kine ki snem ba la leit, ka Meghalaya kam ju shim bording na ka NTPC namarba ka dor jong ka bording ilektrik ka long kaba kham rem, hynrei katkum ka soskular pat, ka NTPC ka dei beit ban siew pisa sha ka NTPC lada shim ne khlem shim ïa ka bording.
U Mondal u la ong ba namarba ka dor jong ka bording ilektrik ka la kham rem ha ïew, kan long ka jingmyntoi lada shim bording na ka NTPC mynta khamtam namarba ka Jylla kam don kino kino lad pynmih bording lait na kaba den ïa ka um ha ki wah.
