Nongpoh, Risaw 19
Kum shi bynta ban pynshlur ïa ki samla pule ka Ri Bhoi ba kin pyntbit ïalade ha ka sobjek Science, ka Nongpoh Ram Mandir Durga Puja Committee kaba don ha Nongpoh ka la pynïeng syndon da u Chandrayan-3 hakhmat katei ka jaka lehniam kaba la don mynta la kumba 96 snem eiei naduh ba la sdang thaw ha u 1927.
Kum ban shu ïathuh khyndiat, kane ka jinglehniam Durga Puja jong ki riewngeit Hindu, la sdang naduh ka 15 tarik bad yn pynkut pat ha ka 24 tarik mynta u bnai Risaw ha kaba la ïohi ba ka la don bun ka jingpynkhreh pynkhrum bad ki jingpynitynnad ruh ha katei ka jaka lehniam.
Haba ïoh ban ïakren bad u Unteshwar Singh, President jong ka Nongpoh Ram Mandir Durga Puja Committee, u la ai khublei Durga Puja ïa baroh ki paidbah ka them Ri Bhoi bad ïathuh ba ka daw kaba la pynlong ïa ki ban pynïeng ïa u Chandrayan-3 hakhmat ka jaka lehniam mynta ka kynti, ka long ba bunsien la ïohi ba ki samla na Ri Bhoi ki ju shim ban pule tang ha ka lain Arts bad Commerce da kaba klet noh ïa ka Science. Kumta, lyngba kane ka jingpynïeng ïa u Chandrayan-3, u Unteshwar Singh u la ong ba lehse kan pynshlur bad pynktik ïa ki samla pule ka Ri Bhoi ba kin minot bad shim ïa ka Science bad long ki riewkhraw ha ka Ri ban wanrah ïa ka nam ka burom ïa ka Ri Bhoi hi baroh kawei.
