Shillong, Risaw 19
U Myntri ba khmih ïa ka tnat Jngohkai Pyrthei ka jylla u Bah Paul Lyngdoh ha ka Sngi Palei u la ong ba na ka liang jong ka Sorkar kam shym la pynbor satia ïano-ïano bad la ieh ha ka mon ba laitluid jong ki paidbah, ai kiba sngewtynnad kin leit bad ki bym sngewtynnad kin nym leit sha kata ka tamasa Cherry Blossom ïa kaba yn pynkut ha ka Sngi U Blei.
“Ka jingmih jong ki jingpyrshah, ka paw kumba ka don ka buit politik kaba don na sha lyndet bad ba ki don ki bor kiba pyrshang ban khanglad ïa ka jingkiew jong ka kam jngohkai,” la ong u Bah Paul haba kren sha ki lad pathai khubor.
“Ki don ki bor na sha lyndet kiba pyrshang ban khanglad ïa ka jingkiew ki kam jngohkai pyrthei hapoh ka jylla bad ïa kane lah ban ïohi na ka jingmih ka jingpyrshah na ki katto-katne ki briew kiba sngew ba ki kham stad ma ki ban ïa ki nongmihkhmat kiba la shah jied ha u paidbah,” la ong biang u Bah Paul.
“Ngim shym la buh kyndon ne pynbor ïa ki briew sha kane ka tamasa, hynrei ki paidbah ki don ka jinglaitluid ban leit ne ban nym leit. Hato phi mut ban ong ba ha ka Sngi U Blei, ngin khang noh ïa baroh ki cinema hall, ki bar, ki restaurant, ki park bad phah ïa baroh ki briew ban leit sha ïingmane. Hato ka Sorkar ka lah ban leh ïa kane?” la kynthoh u Bah Paul bad bynrap ba kane ka jingpyrshah ka dei ka bym shongnia satia.
Nalor kane, u Myntri u la ong, ka jingthmu jong katei ka tamasa ka long ban khring ïa ki nongjngohkai pyrthei bad ka jingjied ïa ka jaka ha Ri-Bhoi District, ka long ba ka sorkar ka kwah ban kyntiew ïa ka ïoh ka kot, ban plie ka lad na ka bynta ki nongshong shnong ba kin ïoh ka kamai lyngba ki kam die jingdie, ki kam kamai kali bad bun ki lad.
Haba kylli pat kumno ka sorkar kan leh lada ka don ka jingpyrshah bad jingpynthut ha katei ka sngi pynkut ïa ka tamasa, u Myntri u la ong ba ka sorkar kan nym ailad satia bad kan sa leh ïa kaei kaba dei ban leh.
