Shillong, Risaw 19
Ka jingshna ïa ka ‘Fly-over’ ka lah ban long na Anjalee Point sha Jhalupara lane na Barik Point sha Jhalupara kum shi bynta na ka jingpynheh ïa ka surok na Shillong sha Dawki.
Kane ka la paw ha ka Sngi Palei ha ka por ba ka Meghalaya High Court ka la shong bishar halor ka mukotduma ba la ai da u nongïasaid aiñ, u Kaustav Paul pyrshah ïa ka sorkar Meghalaya bad kiwei.
Ha kane ka sngi, ka High Court ka la pyntip ba ha ka 16 tarik Risaw, 2023, ka National Highways and Infrastructure Development Corpo-ration Limited (NHIDCL) ka la ai da ka jingthoh ha kaba ïadei bad ka jingshna ïa ka surok kaba hap hapoh ka song banyngkong lane ka ‘Package One’ na ki san tylli ki song (Five Package) jong ka surok Shillong-Dawki.
Ka NHIDCL ka la pyntip ba ïa ka kam ban pyntrei ïa ka ‘Package One’ la aiti noh sha u kontraktor bathymmai ha ka taïew bakhatduh jong u Nailur, 2023 hadien ba u kontraktor banyngkong u la iehnoh ïa ka kam.
Nalorkata, ka paw ruh ba la lah ban pynbeit ïa ki jingpynwit kiba kongsan. Ka NHIDCL ka la pyntip ba ha ka jingïalang kaba la long hapdeng ka Indian Institute of Geomagnetism (IIG), sorkar jylla bad ka NHIDCL, bad kiwei, la rai ban shim ïa ka jaka ha ka thaiñ Upper Shillong, kaba dang hap hapoh ka jingpeit jong ka IIG khnang ba yn lah ban pynïar ïa ka surok.
La pynpaw ruh ba hadien ba ka IIG kan duh noh ïa kata ka jaka ban pynheh ïa ka surok, ïa ka jaka kaba sah yn pyndonkam na ka bynta ban buh ïa ki shlem treikam bad ki jaka sah ki nongtrei. Ka sorkar jylla ka la mynjur ban ai da kawei pat ka jaka ïa ka IIG khnang ba kan lah ban buh ïa ki kor ki bor jong ka. Ka sorkar jylla ka la mynjur ruh ban bei ïa ka jinglut jingsep na ka bynta kane ka jingpynkynriah ïa ki kor ki bor na ka IIG.
Namarkata, ka paw ba ka jingshna ïa ka surok ha ka bynta banyngkong, ba kynthup ïa ka ‘Fly-over’ na Anjalee Point sha Jhalupara lane na Barik Point sha Jhalupara, kan sdang noh shen.
Ka High Court ka la kyrmen ba yn sa lah ban shim rai noh kham kloi naei ka ‘Fly-over’ kan sdang bad haei kan kut.
“Shisien ba ka kam jong ka jingshna ïa ka ‘Fly-over’ kan sdang, yn lah ban pynkhyllem ïa ki dieng hadien ba la ïoh jingbit na ki bor ba dei khmih katkum ki kyndon aiñ,” la ong ka High Court.
Ka la kren shai ruh ba ka jingbteng jong kane ka mukotduma lane ki hukum barim jong ka ïingbishar kaba la khang ban pynkhyllem ïa ki dieng, kan ym treikam ha kane ka por.
Nalorkata, shisien ba la sdang ïa ka jingpyntrei ïa ka surok haduh Upper Shillong ha ka jaka ba don ka IIG, yn sa lah ban pynkhyllem ïa ki 39 tylli ki dieng hadien ba la ïoh ïa ka jingbit na ki bor ba dei khmih.
“Kaei kaba donkam ban lah ka long ban pynkhyllem tang ïa ki dieng kiba donkam na ka bynta ban ïoh pynheh ïa ka surok. Hynrei ym dei ban pynkhyllem lypa ïa ki dieng lane ban pynkylla ïa ka saiñdur hadien. Dei ruh ban thung ïa ki tynrai dieng bathymmai ha kiwei ki jaka,” la ong ka High Court.
La bthah ruh ïa ka bor kaba la ïoh jingbit ban pynkhyllem ïa ki dieng ban peit ïa ka jingthung bad ka jingheh jingsan jong ki dieng na ka bynta ar snem.
Nalorkata, ka High Court ka la ong ba ka sorkar jylla bad ka NHIDCL ki dei ban pynthikna ka jingpyntrei ïa ka surok ha ki saw tylli ki bynta kiba sah ka dei ban ïaid sted bad ban pyndep kham kloi. Lada don ki jingeh ne ki jingwit ne ka jingbym lah ban shim jaka, yn hap ban pynbeit ïa kine da ka jingtuklar jong ka sorkar jylla.
