Tura, Risaw 19
U Chief Secretary ka jylla, Bah Donald P Wahlang, ha ka Sngi Palei u la ong ba ka jingïaid lynti jong ka Meghalaya Board of School Education (MBoSE) ka long kum ka jingïalehkai phutbol.
“Ka jingïaid lynti jong ka MBoSE ka long kum ka jingïalehkai phutbol. Ha ka ‘Half-Time’, la pynbeit thymmai ïa ka MBoSE ha u snem 2006 naduh ba la seng ïa ka ha u snem 1973. Mynta ha u snem 2023, ngi rakhe ïa ka jingdap 50 snem jong ka. Ka eksamin MBoSE banyngkong ka la long ha u snem 1974 bad ki la don tang kumba 3,800 ngut kiba la ïakhun. Hynrei kane ka la kiew sha ka 80,000 ngut ha ka eksamin Matrik bad Klas XII,” la ong u Bah Wahlang ha ka sngi ba la pynkut ïa ka jingrakhe ba lai sngi lynter ïa ka jingdap 50 snem jong ka MBoSE ha Tura.
Ha kane ka sngi, la don lang u Myntri Rangbah, u Conrad K Sangma, u Myntri ka tnat pule puthi, u Rakkam A Sangma bad kiwei.
Nalorkata, u Bah Wahlang u la kdew ba ka jingnang ban thoh bad pule ka la kiew na ka 24.49% sha ka 80% mynta katba ki skul ki la kiew na ka 40-50 tylli sha ka 2,923 tylli kiba la pynïasoh sha ka MBoSE.
Na ka liang u Myntri Rangbah u la ong ba ka sorkar kan shim ïa ki lad ki lynti ban pyndonkam hok ïa ka sap ka phong ki samla samhoi ka jylla.
“Ka dei ka kamram jong ka sorkar ban buh hapdeng ïa ki samla samhoi ha kino-kino ki kam kiba ngi leh,” u la ong.
U la ong ruh ba ka dei ka kamram jong baroh ban sara ïa ki samla samhoi bad ban btin lynti ïa ki khnang ba kin long ki nongshong shnong ki ban wanrah jingmyntoi, kiba ieid ïa ka Ri, kiba im adkar bad kiba sheptieng ïa U Blei.
U Conrad u la ai burom ruh ïa ki nongïalam kiba la shim ïa ki sienjam kiba kongsan ban pynpoi ïa ka MBoSE sha ka kyrdan kumba ka long mynta.
Ha kajuh ka por, u la ong ba ka pule ka puthi ka ïakynduh ïa kiba bun ki diengpyngkiang ha kane ka por, hynrei kita ki jingeh kim dei pat ban pynkynran dien ban kyntiew ïa ka pule ka dangle.
