Jowai, Risaw 19
U Chief Justice ka Meghalaya High Court u Sanjib Banerjee ha ka 19 tarik Risaw u la plie ïa ka ïing treikam bathymmai jong ka ïingkashari District & Sessions Court ha Khliehtryshi, West Jaiñtia Hills District ha ka jingdonlang u Symbud Myntri Rangbah ka Jylla u Bah Sniawbhalang Dhar.
U NA Khan, District & Session Judge ka West Jaiñtia Hills District ha ka jingkren lamkhmat u la pyntip ba ïa ka District Judiciary la pynïakhlad na ka Executive ha ka 27 tarik Naitung, 2013 bad ka la treikam na ka shlem treikam Deputy Commissioner West Jaiñtia Hills.
U la pyntip ba ka jingtei ïa kane ka ïingkashari ka long ha ka jingheh kaba 11.162 akar bad la tei ha ka mang pisa kaba T.35,89,82,000/- (Laiphew san klur Phra phew khyndai lak phra phew ar hajar tyngka). Kane ka ïingkashari ka don ïa ka mala kaba shatrai ne Ground Floor bad lai tylli ki mala ba shalor baroh ka jaka ne Floor area ka long 93,631 Sq.ft (8698.60sq, metrs), ka don ruh haduh 7 tylli ki kamra bishar ne Court room.
U la pyntip ba ki mukotduma kiba dang sahkut hapoh ka District ki long 978 (Criminal Case 718 Civil Cases 260).
U Chief Justice ka Meghalaya High Court u Sanjib Banerjee haba kren ha ka jingïalang u la ong, kane ka jingtei kaba thymmai kan ai jingmyntoi bad ïarap ïa ki paidbah ban ïakhun ïa ki mukotduma jong ki.
Shuh shuh u la pynpaw ruh ïa ka jingdonkam ban don ki District Session Court, ki ban shim ïa ka bynta kaba khraw bha ban pynïoh ïa ka jingbishar kaba hok sha ki paidbah. Nalorkata u la ban jur ban don ka jingbishar kaba sted, ka bym noh shiliang ïa ki paidbah.
U Chief Justice u la ai khublei ruh ïa ka sorkar jylla bad baroh kiba don bynta ban pynurlong ïa ka District Session Court na ka bynta ban pynduna ki mukotduma kiba sahteng bad ban wanrah ïa ka jingbishar ba hok sha ki paidbah.
Ha kane ka sngi la donlang u Justice HS Thangkiew (Judge), u Justice W Diengdoh (Judge), u Justice B Bhattacharjee Additional Judge, u Registrar General ka Meghalaya High Court u Bah E Kharumnuid, u MLA ka Jowai u Bah Wailadmiki Shylla, u Deputy Commissioner ka West Jaiñtia Hills District u Bah BS Sohliya, u Dolloi ka Elaka Jowai u Puramon Kynjin, ki muktiar ka District, ki nongïalam shnong nalor kiwei kiwei.
