Shillong, Risaw 19
Ka Joint Action Committee (JAC) kaba kynthup ïa ki kynhun na ki seng bapher-bapher na Ri-Bhoi ki la rai ban ïeng tylli bad ban dawa na ka Sorkar ba ka dei ban pynkynriah noh ïa ka tarik pynkut ïa ka tamasa Cherry Blossom, ym ban pynkut bad pynlong ha ka Sngi U Blei.
Ki seng kiba la thaw ïa katei ka JAC ki long ka Hynñiewtrep Youth Council (HYC), Meghalaya People United Front (MPUF), Ri-Bhoi Youth Organization (RBYO), United Hynñiewtrep Movement (UHM), Saiñdur Tipkur Tipkha Ehrngiew Hynñiewtrep (STIEH) bad ka Meghalaya People’s Social Organization (MPSO).
Na ka liang jong ki nongïalam ka JAC ki la maham ba lada na ka liang jong ka sorkar kam sngap bad kam pynkynriah bad ïaid beit ban pynkut ïa katei ka tamasa ha ka Sngi U Blei, kin nym ailad satia hynrei kin pynlong da ka jingïakhih.
Haba kylli kum kiei kita ki jingïakhih ba kin shim bad pynlong, ki la ong ba ha kaba ïadei bad kane, kin sa ïakynduh bad shong pyrkhat kam biang.
Lah ban kdew ba ha ka Sngi Palei, ki nongïalam ka JAC ba kynthup na kitei ki seng bapher-bapher, ki la leit sha Secretariat da ka jingthmu ban ïakynduh ïa u Myntri ka tnat ki kam Jngohkai u Bah Paul Lyngdoh.
Pynban kham hadien katto-katne por, ki la mih na ka kamra u PA jong utei Myntri ryngkat ka jingpynpaw ka jingbitar ba u Myntri um shym la treh ban ïakynduh ïa ki. Nalor nangta ki la ong ruh ba na ka liang jong u PA u Myntri, u la buh jingkylli pynban ba ki kwah ban ïakren halor ka mat aïu?
Hadien ka jingbym ïoh ban ïakynduh ïa u Myntri, na ka liang u President ka RBYO u Bah BG Lapang haba kren sha ki lad pathai khubor u la ong ba kum ki kynhun ki pyrshah jur ïa ka jingpynlong tamasa Cherry Blossom ha ka 19 tarik Naiwieng kaba dei ka Sngi U Blei bad kum ka JAC kan nym shongthait ban ïaleh bad ka jingpyrshah kan long tat haduh katba ka sorkar kam pat pynkynriah ïa ka tarik.
“Ngin ïeng ban pyrshah jur da kaba rah placard bad ruh ba lada mih kano-kano ka jingjia, ka sorkar ka dei ban shim ka jingkitkhlieh. Kane ka dei ka jingsdang jong ka sorkar ban pynduh jait noh ïa ka Sngi U Blei, hato ki kwah ban pynduh noh ïa ka jinglong Khristan ka jong ngi. Dei ban burom lem ïa ka jinglong Khristan ka jong ngi,” la ong u Bah Lapang.
Une u nongïalam ka RBYO u la ong ba ki paidbah kim don satia ban pyrshah eiei ïa ka jingpynlong ïa katei ka tamasa, hynrei ba kim sngew ïahap pat ban pynlong ïa ka ha ka Sngi U Blei kaba dei ka sngi kaba kyrpang na ka bynta ki riewngeit Khristan.
U la ong ba kum ki kynhun seng ki la long kiba la khreh lypa ba lada ka sorkar ka ïaid beit shakhmat bad ki jingthmu, na ka liang jong ki ruh kin nym banse ban ïaid shakhmat da ki jingïakhih.
