Shillong, Risaw 19
Ka Congress ka la pyntip ba ka long kaba la pynkhreh ïa ka ilekshon MDC lada pynlong ha kano-kano ka por, bad shen ka Election Committee kan sa pynmih ïa ka jingpynbna ban khot ïa kiba kwah ban ïakhun kum ki kyrtong jong ka seng na ki konstitwensi bapher-bapher.
Haba ïakren bad ki lad pathai khubor ha ka Sngi Palei kum shibynta ka jingpynlong ïa ka Youth Convention jong ka Meghalaya Pradesh Youth Congress (MPYC), u President ka MPCC, u Bah Vincent H Pala u la ong ba ka seng ka long kaba pynkhreh la ka dei ïa ka ilekshon MDC ne ilekshon MP hynrei ka shong ha ka sorkar kaei kaba kan leh haba ïadei bad ka ilekshon MDC.
U la ong ba ka Congress kan sa bthah ban nang pdiang noh ïa ki kyrteng jong kiba kwah ban ïakhun ïa ka ilekshon MDC bad yn ailad ha ki block bad district ban kham peit bniah ïa ki briew hashwa ban rai da ka Election Committee jong ka MPCC.
Haba kylli la ka aiñ rew ban pynkylla ïa ka 6th Schedule ka lah ne em ban wan ha ka dorbar tlang jong ka Parliament, u Bah Pala, uba dei ruh u MP ka Shillong, u la ong ba ïa ka aiñ-rew ha Lok Sabha la dep wanrah naduh u snem 2019, hynrei la phah noh sha ka Committee ban khmih bniah bad pan jingmut biang na ki Jylla kiba don ki Autonomous District Council.
U la ong ba hadien ba la ïoh ïa ki jingai jingmut jong kito ki jylla kiba pyntreikam ïa ka 6th schedule, lehse ka Sorkar Pdeng kan wanrah biang ïa ka aiñ-rew ha ka dorbar jong ka Parliament ka ban sa wan namarba ka Bharatiya Janata Party ruh ka don ïa ka jingthmu ban wanrah ïa ka mat halor ka jingpynkylla ïa ka 6th schedule namar donkam ban pynbeit katto-katne kiba donkam kynthup ïa ka jingpynbun shuh shuh ïa ki dkhot.
Haba kylli halor ka jingïatreilang ka Congress bad ka NPP ha KHADC, u Bah Pala u la ong ba ka Congress ka kloi ban ïatreilang bad kiwei kiwei ki seng lait noh ka BJP.
“Ngi la kren da kaba shai bad ong ruh ïa ki nongïalam ka AICC ba ngi ïatreilang ha KHADC namar ym don ka BJP, bad ngi kloi ban ïatreilang bad kiwei kiwei ki seng lait noh ka BJP. Haba ngi ïatreilang, kum ka seng ngi buh hakhmat ïa ki mat kiba donkam ïa ka jaitbynriew lyngba ka District Council naduh ka jingpynkylla ïa ki kyndon ka 6th Schedule bad kiwei kiwei ki kyndon ha ka liang ka khyndew ka shyiap,” la ong u Bah Pala.
