Shillong, Risaw 19
U MLA ka Congress, u Saleng A Sangma, uba mihkhmat ïa ka Gambegre konstitwensi u pynkynmaw ïa ki samla ka Congress kumno u ïaishah bad mad ki jingtynjuh ha ka saiñ hima namar wat ka ïing jong u ka shah hiar thma ha ki snem ba la leit noh bad u MLA uba ïaishah ban don ha ka liang pyrshah.
U Saleng u la ai jingkren ha ka Convention jong ki samla Congress ka Jylla ba la pynlong da ka Meghalaya Pradesh Youth Congress (MPYC) ha U Soso Tham Auditorium ha ka Sngi Palei.
U Saleng u la kyntu ïa ki samla ba ki dei ban shimbynta shitrhem ban leh eiei ïa ki jingeh ha ka imlang sahlang ym tang ban shu ïatai ïa ki, bad ïashimbynta ruh ha ka saiñ hima ban shakri ïa ka imlang sahlang.
Haba ïasam ïa ki jingeh jong u shimet bad ki jingtynjuh ha ka saiñ hima, u Saleng u la pynshlur ïa ki samla ka Congress ban long ki nuksa na ka bynta kiwei bad long kiba ïaishah haba banjur ban don ka nongrim ha ka jinglong nongïalam.
U Saleng uba la shahjied kum u MLA naduh u snem 2008 khlem pat shahrem, u la ai nuksa ruh kumno u ïaineh kum u MLA ha ka liang pyrshah khlem kynriah.
U la ong ba ki don kiba ym lah ban shah ban don ha ka Liang Pyrshah bad tang katto katte, ki phet noh sha ka Liang Synshar namar ka seng jong ki ka don ha ka Liang Pyrshah.
U Saleng u la pynkynmaw ruh kumno u hap ban shahbeh noh na ka Congress tang na ka daw uwei u briew bad mynta u la don biang bad ka Congress namarba ym don shuh uta u briew.
U la ong ba u dei uwei na ki MLA uba neh slem ha ka Liang Pyrshah da kaba burom ïa kito kiba duh ïa ka jingim na ka bynta jong u, bad u la banjur ban pynshong nongrim ïa ka dor jong ka jingïaineh bad ïaishah.
U Saleng u la batai ruh kumno u wanphai biang sha ka Congress bad kumno u don ka jingangnud ban nohsynñiang bad ka jingdonkam ban phaidien ïa ka rukom ka saiñ hima sima.
Ïa kane ka Convention la wan ïashimbynta da ki samla ka Congress na baroh kawei ka Jylla nalor ki nongïalam ka AICC bad MPCC nalor ki longkmie ka Congress. Kiba la wan ban ïashimbynta ki long u heh ka AICC u Manish Chatrath, u MP bad President ka MPCC u Bah Vincent H Pala, u nongïalam ka Liang Pyrshah u Bah Ronnie V Lyngdoh nalor ki MLA bad MDC.
