Shillong, Risaw:
Da ka Seminar halor ka phang ” Khasi Orthography: kumno ban buh beit buh ryntih ïa ka rukom spel dak ha ka ktien khasi” pynlong ka Khasi Department Jong ka Mawsynram Border Area College.
Ka Khasi Department jong ka Mawsynram Border Area College, kawei na ki college ba don ha ka shnong Mawsynram ka la pynlong ïa ka jingïamir jingtip Seminar ha ka 18 tarik Risaw 2023 hapoh ka College. Ha Kane ka sngi i Dr. Dorismelinsy Byrsat, Assistant Professor jong ka Khasi Department ka St. Anthony College, Shillong i la long kum i Resource Person ban ai jingbatai halor ka phang kumno ban buh beit buh ryntih ïa ka rukom spel dak ha ka ban thoh ïa ki dak thoh Khasi.
La pamphang ïa kane ka Seminar da i Babu Kitboklang Iawrod i ba dei i nonghikai Khasi jong kane ka college, la ïashim bynta ruh ha ki jingkren da i kong M.Sohsten Head Department jong ka khasi Department bad i Kong Glorious Diengdoh nonghikai jong ka Khasi Department.
Haba ai jinghikai ha kane ka Seminar i nongkren Dr.D.Byrsat i la pynkynmaw ïa ki Matti jong u Thomas Jones naduh ka snem 1841 ha ryngkat ïa arngut ki Rangbah Khasi kiba la ïarap ia u Thomas Jones ban sngewthuh kham bha ha ka ban pynbeit bha ïa ka ktien khasi kata u Junkha bad u Duwan Rai.
I la batai bniah ruh halor ki rukom wanrah ïa ki dak thoh khasi kiba kham janai ka dei naduh u snem 1896 ter ter kumjuh ruh i la pyni lyngba ki Slide ïa ka rukom spel dak ha ki por u Thomas Jones bad ki por u Dr.H. Robert ki la long kiba kham pher. I la pynkynmaw ruh ïa ki rangbah Khasi kiba lah noh synñiang ïa u dak ‘ï’ bad ‘ñ’ bad ïa ka rukom ban buh beit ïa ki dak thoh Khasi khamtam ïa ki kyntien ba sawa kumjuh hynrei ki pher ki jingmut kum, ‘sat bad sad” bad ki kyntien kiba kijuh ki rukom spel ki pher ki jingmut kum ‘Sum bad Sum’, bad bun kiwei pat ki mat kiba i Resource person i la pashat ha kane ka sngi. Ka la don ruh ka jingïamir jingmut lang da ki nonghikai ha kaba ïadei bad ka jingpynrung ïa ka ktien khasi ha ka khyrnit ba phra jong ka Riti synshar ka ri India.
Ha Kane ka seminar la ïashim bynta da ki nonghikai, ki samla pule jong ka Khasi Department bad kiwei pat ki samla pule jongka college. La pynitynnat ïa kane ka seminar da ki jingrwai bad ki jingshad tynrai na ki samla pule ka khasi Department jong ka college bad da ki jingkren na u Principal Incharge jong ka college i Babu W. Lyngdoh ha kaba i la pynkynmaw ïa ki kyntien kiba ong, “Haba im ka ktien im ka jaitbynriew”.
