Shillong, Risaw 19
Ka Sorkar Jylla ka la pyntip sha ka Ïingbishar ba ka la don jingthmu ban kham pynbha shuh shuh ïa ki jingdonkam ki jaka thang briew ha saw tylli ki nongbah kita ha Shillong, Tura, Jowai bad Nongpoh.
Ïa kane la pyntip da ka tnat Social Welfare ka Sorkar Jylla ha ka kaiphod kaba lyngkot kaba phah sha ka Meghalaya High Court ha ka por ba don ka jingbishar ha ka sngi Palei ïa ka mukotduma PIL kaba la mudui da ka Seng Khasi Hima Mawsynram.
Ha kane ka hukum, ka Ïingbishar lyngba ar ngut ki nongbishar kiba kynthup ïa u Chief Justice Sanjib Banerjee bad Justice, B. Bhattacharjee ka la ong ba ka kaiphod ka la aiksai ba ki jingtyrwa ki la don na ka bynta ban kham pynbiang shuh ïa ki jingdonkam ki jaka thang briew ha kitei ki nongbah.
Ka kaiphod ka la buh lang ruh ïa ka Nongstoiñ tangba ym pat don kano-kano ka jingtyrwa kaba wan sha ka Sorkar haba ïadei bad kane.
Ka Ïingbishar ka la ong ba haba ïadei bad kitei ki saw tylli ki nongbah kynthup ka Shillong, ïa ki jingtyrwa la kdew hapoh ka Special Assistance Scheme for Capital Investment 2023-24, hynrei ym don kano-kano ka jingkiew haba ïadei bad ka jingtrei kaba la tyrwa ban pyntrei.
“U snem mang tyngka 2023-24 u la jan poi sha ka samoi ban kut artad sa tang khyndiat bnai, bad ym ïohi ba don ki dak ba la ïaid ka kam shakhmat ban kham pynbiang ïa ki jingdonkam ha kitei ki saw tylli ki jaka,” la ong ka Ïingbishar.
Ka Ïingbishar ka la bthah ïa ka Sorkar Jylla ban wanrah ka kaiphod kaba kham biang shuh shuh kaba pyni lang ïa ka rukom pynkhreh ban pyntreikam. Ka Ïingbishar ka la pynkynmaw ruh ïa ka hukum kaba la pynmih ha ka 3 tarik Risaw ha kaba kren ym tang shaphang ki jaka thang briew hynrei ki jaka tep briew ruh ha kaba ha ka kaiphod, ym shym la pyni ei ei haba ïadei bad ki jaka tep briew na ka bynta ki jaitbynriew bapher-bapher.
