Shillong, Risaw 19
Ka Shillong Press Club (SPC) haba pynrem jur ka la pynpaw ïa ka jingsngewsih jur bad jingbitar halor ki jingkynthoh bad kynnoh ba khlem nongrim da u nongïalam ka Voice of People Party (VPP) u Bah Ardent M Basaïawmoit, MLA ka Nongkrem pyrshah ïa ki lad pathai ka jylla.
Ha ka kyrwoh khubor ba la pyllait da u President Bah David Laitphlang bad u General Secretary Bah Powell Sohkhlet ki la ong ba ka long kaba sngewsih ba kum uwei na ki nongïalam ba la ih ban wanrah ki jingkynnoh kiba khlem nongrim pyrshah ïa ki lad pathai khubor ba ki wanrah ïa ki khubor ki bym shisha bad khamtam lei lei ka jingkren beiñ ïa ki nongthoh khubor ka jylla ba ki dei kiba la shah pynngop ha ki khubor ba la siew pisa.
Kitei ki nongïalam ka SPC ki la ong ba ka long kaba kyndit ban ïohsngew ba u Bah Ardent u la kren sha ki paidbah ha ka jingïalang ba ki lad pathai khubor kiba wan lum ïa ki khubor ka VPP, ki wad bad kdew beit thik tang ïa ki jingduna kiba don hapoh ka seng.
U Bah David bad Bah Powell ki la ong ba na ka liang ka SPC ka kwah ban pynkynmaw ïa u Bah Ardent ba ka kamram jong u nongthoh khubor ka long ban lum ïa ki jingtip la ki dei kiba bha ne kiba sniew kiba don ïa ki jingshisha ym ban lum ïa kiba la shu ïohsngew wer-wer ne na ki khana nangne-nangtai.
Shuh shuh ka SPC ka kwah ba u Bah Ardent un kren shai ba hato ka VPP ka khmih lynti tang ïa ki jingtip bad ki khubor ba bha ban thoh ïa ka lane ka VPP ka kwah ban shu jied noh tang katto-katne ki ban lum khubor jong ka seng ha ki por ban wan.
Ha kajuh ka por ka SPC ka kwah ruh ban pynkynmaw ïa u Bah Ardent ba ka jingbha ka risol jong ka seng ha ka ilekshon MLA kaba dang shu dep, ka leit ruh sha ka jinglah jong ki lad pathai khubor ban ai ïa ki khubor ha kino-kino ki rynsan ba ka ïeng. Kumta hato kane ka mut ba baroh kito ki lad pathai khubor kiba la leit lum khubor jong ka VPP ha kito ki por ilekshon ki dei kiba la ïoh jingsiew lane shah pynbieit ha kiwei pat ki rukom.
Namarkata, ka SPC ka dawa ba dei ban ai ïa ka kyrteng jong kito ki nongthoh khubor kiba la shah kynnoh leh shiliang bad kiwei ki jingkynnoh namar ka jingkynnoh kyllum ïa ki lad pathai khubor baroh ka long pyrshah ïa ka kam shakri hok.
Nalor kane, la dawa ruh ban ai jingpynshai halor kane bad ruh ka jingpanmap mardor, bad lada ym lah ban leh, na ka liang ka SPC kam banse ban sa pyrkhat kam da kumwei pat, la pynkut ka kyrwoh na u Bah David Laitphlang bad Bah Powell Sohkhlet.
