Tura, Risaw:
Ki nonghikai SSA kiba don hapoh ka synjuk jong ka All Garo Hills SSA School Teachers’ Association (AGHSSASTA) ki la rai ban pynsangeh noh shuwa ïa ka jingïakhih kaba la dei ban sdang naduh lashai ka sngi ha ryngkat ka jingmaham sha ka Sorkar Jylla ban phah ïa ka tulop sha ki ‘account’ jong ki.
Kham ha shuwa, ha ka 11 tarik Risaw, ka jingpyllait ïa ka tulop ki nonghikai SSA ka la sdang naduh ka 11 tarik Risaw, hynrei ym shym la don iwei ruh i nonghikai iba la ïoh pdiang ïa ka pisa (kaba la poi sha ki), ha kawei ka liang kaba la pynbitar shi kat dei ïa ki.
Kane ka la pynlong ïa ki nonghikai ban pynbna ïa ka jingïakhih ha Tura ha ka 18 tarik Risaw.
Katkum ka kyrwoh na ka seng, ka rai ban pynsangeh noh ïa ka jingïaid paidbah ha Tura ka la wan hadien ka jingpyllait ïa ka tulop ba 2 bnai jong ki ha ka 16 tarik Risaw na ka ophis SPD, SEMAM, Shillong.
Ki nonghikai ki la pynpaw ruh ka jingbym sngewtynnad halor ka rukom pyllait tulop.
“Ngi sngewsih haba ïadei bad ka rukom pyllait tulop jong ka Sorkar Jylla sha baroh ki nonghikai SSA ka Jylla. Ngi kyrpad ïa ka Sorkar ban phah noh kloi ïa ka tulop sha ka ‘account’ jong ngi lym kumta ngin ym long ki nongpeitkai. Ngim lah sngewthuh kumno ka Sorkar ka lah ban pyllait ïa ka ‘salary order’ jong ngi naduh mynshem taïew (naduh ka 11 tarik Risaw) khlem da phah ïa pisa sha ‘account’ jong ngi,” buh jingkylli ki nonghikai.
