Shillong, Risaw 19
Ka Dorbar Shnong Mawbah ka la kyntu ïa ki trai jaka, ki trai ïing kiba dei ki Khasi ba ki dei ban phah sah da ki bahaïing jong ki lada kim treh ban sah dalade ha ka shnong Mawbah kaba hap ha West Shillong konstitwensi khnang ban kham bun paid ki Khasi ha kane ka shnong.
Kane ka jingkyrpad ka shnong kaba don marjan bad ka shnong Mawprem, Jhalapura ka dei namar kiwei ki jaidbynriew ki la kharoi ka jingbun briew palat 12,000 ngut bad katba ki Khasi ki dang duna paid namar ki don tang 700 ngut.
Haba ïakren bad u Rangbah Shnong Mawbah, Bah Aristone Thabah ha ka jingïadonlang ki nongkitkam shnong, u la ïathuh ba 70 percent ki trai ïing ha Mawbah ki dei trai da ki Khasi tangba ki sah ha kiwei ki shnong, katba kiwei ki jaidbynriew kiba shu wan shong wai ki la roi sted naba ki la kot palat khatar hajar ngut ka jingdon briew.
Kumta u la kyntu ïa ki Khasi kiba dei ki trai jaka lada kim lah ban sah dalade ki lah ban phah sah da ki bahaïing jong ki khnang ban roi ki Khasi ha kane ka shnong.
U la kyntu ruh ïa ki para Khasi ba ki dei ban wan shong wai ha shnong Mawbah namar ïa ka bai wai ïing kin sa ïakren hi ki nongïalam shnong ïa ki trai ïing.
Ha kajuh ka por u la ai khublei ïa ki rangbah Khasi kiba mynshwa kiba la knieh ïa ka bor synshar na kiwei ki jaidbynriew kiba la sdang ban pynïaid ïa ki kam shnong, hynrei mynta watla ki Khasi ki don tang khyndiat ngut, pynban ïa ka bor synshar shnong dang bat beit da u Khasi.
Nalor nangta, u la ai khublei ïa ki Rangbah Shnong kiba la leit noh namar ki la ïoh ban pynkylla ruh ïa ka kyrteng Barapathar sha ka Mawbah kaba dei ka kyrteng Khasi.
Nalor kane, u Bah Thabah u la ïathuh ba ka shnong naduh ki snem ba la leit ka ju buh kyrteng ïa baroh ki nongshong shnong khamtam ïa kine kiwei ki jaidbynriew khnang ban suk haba tehlakam ïa ka jingwan rung kyrthep hapoh shnong khnang ban shongsuk shongsaiñ.
U la pyntip ba kiwei ki jaidbynriew kiba don ha kane ka shnong ki long ki Bengalee, Nepalee, Punjabi, Bihari bad ki Muslim, hynrei u sngewkmen ban pyntip ba watla ki Khasi ki don tang khyndiat ngut hynrei haduh mynta ki ïatylli.
Ha kajuh ka por u la pyntip ba ka Executive Committee kaba thymmai kan sa pyntreikam noh ba nangne shakhmat ïa ki briew kiba nabar kiba kwah ban wan sah ha kane ka shnong kin nym shah shuh hynrei kin pdiang beit thik tang ïa kine kiba la don lypa.
