Shillong, Risaw 20
Ka Hynñiewtrep National Youth Front (HNYF) East Khasi Hills District ha ka Sngi Thohdieng ka la leit ban ïakynduh ïa u Additional Deputy Commissioner ka East Khasi Hills District, u Bah PT Passah hadien ba ki bor pulit ki la khang kynsan ïa ka jaka pynïeng ar shaka ha Bimola; ka surok ter ter ban kiew sha Motphran kaba la shim wai bad pynïaid da u Bah Embhahlang Shadap ha ka step jong ka Sngi Thohdieng.
Na ka liang u Bah Embhahlang u la pynpaw ka jingsngew kyndit kaba khraw ban lap ba ki pulit ki la khang bad buh da ka jingthoh “No Parking” ha katei ka jaka kaba ju lum ïa ka bai pynïeng thuk-thuk wat haba u la ïoh da ki kot ki sla kiba biang.
U Bah Shadap u la ong ba katei ka jaka ka dang hap hapoh ka jingpeit jingkhmih jong ka Khasi Hills Autonomous District Council (KHADC), hynrei la khang pat ïa ka da ka bor pynïaid District jong ka East Khasi Hills halor ka nongrim ba ïa katei ka jaka pynïeng kali la pyntreikam beaiñ.
“Ki pulit ki la ong ba ka hukum ka wan na ka DC hynrei haba peit ïa kiwei kiwei ka jaka pynïeng kali bad thuk thuk, ki la ïoh ka kot ba ha ka 21, 22, 23 tarik naduh 4 shiteng bad 5 baje kim dei shuh ban pynïeng kali ne thuk thuk, hynrei kaba lyngngoh ka long ba ka jaka jong nga la ong beit ban nym shah shuh ban pynïeng thuk thuk ha katei ka jaka baroh kawei hynrei nga pat nga don ka kot ka sla kaba biang bad nga nud ban ïaleh haba nga biang ki kot ki sla”, la kubur u Bah Shadap.
U Bah Shadap u la ong ba la 2 snem kynthih kam ju don satia kano kano ka jingshah pynwit lane ka jingujor na ka liang jong ki bor synshar distrik lane ka Shillong Traffic Police (STP) halor kane ka jaka pynïeng thuk thuk kaba u pynïaid da ma u hynrei kynsan mynta ki pulit ki la shu wan khang kynsan.
Na ka liang u Bah Shadap u la leit ban pan jingïarap na ka HNYF ha kaba na ka liang ka seng ka la leit ban ïakynduh ïa u Additional Deputy Commissioner jong ka East Khasi Hills, u Bah P.T Passah ban pan jingpynshai halor katei ka hukum ba la pynmih da ka shlem treikam jong ka Deputy Commissioner (DC) ha ka 17 tarik u Risaw, 2023.
Na ka liang u Bah Bless Dkhar kum President ka HNYF East Khasi Hills District, u la ong ba lada ka hukum ba la pynmih da ka DC ba ka long kaba beaiñ bad ban nym lah shuh ban lum bai pynïeng thuk thuk ha katei ka jaka, kumta ka kam beaiñ kam dei pat ban treikam jong u Bah Shadap hynrei ka dei ban treikam salonsar ym ban treikam tang ïa uwei bad lada hap ban khang ïa ki jaka ïeng arshaka ne ki kali kiba long beaiñ ki dei ban khang lut ïa baroh kiba don ha kitei ki thaiñ.
“Lada ka hukum ka mih ka dei ban mih ïa baroh khoit ym ban mih tang jong u Bah Shadap bad ka jingpynmih ïa kane ka hukum ka la pynsah lyngngoh, la ong u Bah Bless.
