Shillong, Risaw 20
U Myntri ba peit ïa ka tnat marbam mardih ka Jylla u Bah Comingone Ymbon u la pynpaw ba u pdiang ïa ka lynti rel ha Rilum Jaiñtia namar ka long ka jingmyntoi shibun ïa ki paidbah, bad u la ai nuksa ïa ka rel ha Rilum Garo ha kaba ki paidbah ki hap ban siew T.280 shikhlieh lada leit da ka kali kamai, bad lada leit da ka rel na Mendipathar sha Guwahati, ka long T. 30 shikhlieh.
Kane ka jingpynpaw u Bah Ymbon ka dei ruh ha ka por ba ka Sorkar Jylla ka dang wad ki lad ki lynti kumno ban pynpoi ïa ka lynti rel ha Rilum Jaiñtia.
Haba ïakren bad ki nongthoh khubor, u Bah Ymbon u la ong ba ha ka por ba u leit sha Rilum Garo na bynta ka jingrakhe ïa ka sngi laitluid, u la leit jngoh ïa ka jaka sangeh rel ha Mendipathar bad dalade u la ïohi ïa ki paidbah ka thaiñ kumno ki ïoh shibun ki jingmyntoi.
“Lada leit na Mendipathar sha Guwahati, ki nongkamai kali ki ju pan T. 280 shikhlieh, hynrei da ka rel ka long tang T. 30. Kin mih na Mendipathar ha ka por 7 baje mynstep bad kin wanphai biang ha ka por 7 baje janmiet. Ki nongrep ki kit ar kriah lai kriah ki mar rep kynthup ki soh ban die sha Guwahati bad ki la ïohnong bha. Wat ki marbam ruh, nga la kylli ha u bnai Nailar na ki dukan ba ka dor jong u khaw ha Resubelpara ka long T. 31 katba hangne ha Shillong ka la kot T. 44 bad ka la ïapher haduh katno shuh,” la ong une u Myntri.
U Bah Ymbon u la ong ba lada ka lynti rel ka wan, ki paidbah ka Rilum Jaiñtia ruh kin ïohnong bha da kaba ai nuksa ïa ki marpoh khyndew kum u mawshun, dewïong kiba la ju kit da ki trok bad shongdor haduh T. 2,000 shi ton.
“Nga ngeit ba lada ngi pynkit da ka rel, kan long T, 500 shi ton bad T. 1,500 la ïoh ban kunai noh,” u la ong.
Halor ka jingbteng ban pyrshah ban shna lynti rel, u Bah Ymbon u la ong ba namar ka jingsheptieng ïa ka jingwan kiba nabar, ka Sorkar ruh ka la dep ban mynjur ïa ka rai (official resolution) ban kyrpad ïa ka Sorkar Pdeng ban pyntreikam ïa ka Inner Line Permit (ILP) ha kane ka Jylla, bad ka rai ka shong ha ka Sorkar Pdeng.
