“Ha nongkyndong ki tnad seng ki dang pyndonkam da ki dieng haba lehniam khatduh ïa uba la khlad”

Shillong, Risaw 20

Ka Sengbah ki Nongshat Nongkheiñ  Hynñiewskum Hynñiewtrep ka la ai khublei ïa ka ïingbishar Meghalaya High Court namar ka la pynmih ïa ka hukum ban bthah ïa ka Sorkar Jylla ba kan bei tyngka ban shna ïa ki jaka thang jong ki briew kiba la khlad na ka bynta kiba bat ha ka niam tynrai.

U Bah Ionis Rani uba dei u Secretary ka Sengbah ki Nongshat Nongkheiñ Hynñiewskum Hynñiewtrep kaba don ïa ka jaka treikam ha Bañiun, Upper Shillong u la kyntu ïa baroh ki tnad Seng Khasi ba kin buh noh da ka jingthoh sha ka Sorkar Jylla ban pan pisa na bynta ban shna jaka thang ïa kiba la khlad ban pyndep ïa ka niam ka rukom katkum ka jingngeit.

U la ong ba ki dang bun ki tnad Seng Khasi ki bym pat don ïa ki jaka thang ha ki jaka nongkyndong.

Nalor nangta, u la ïathuh ba ha nongkyndong ki dang bun kiba pyndonkam da ka dieng ban thang ïa kiba la khlad, katba ha sor ki don kiba la pyndonkam da ka bording ilektrik bad don ruh ki jaka ba pyndonkam da ka dieng.

U la batai ruh ba wat la u dang dei u samla, hynrei u bat ïa ka kam Secretary ban ïarap thoh ïa ki riewtymmen.

U la ïathuh haba u don ha kane ka sengbah u kwah ba baroh ki dkhot bad ma u ruh kin dei ban tip ïa kane ka jingknia ne lehniam na ka bynta ka pateng ban wan.

Nalor kata, u la batai ruh ba ïa kane ka sengbah la seng ha u snem 1983 ha Madanrting. Namar ba ka khim palat ki la rah noh sha Bañiun ha u snem 2001-2002. Nangta la sdang ban shna da ka ïeng dewbilat ha u 2019 bad pyndep ha u 2020.

Shuh shuh u la pynpaw ka jingsngewkmen namar naduh ba la dep ïa kane ka jaka treikam ha Bañiun lada don ki jingïalang ka Seng Khihlang bad Seng Khynnah ki wan pynlong sha kane ka jaka namar sha Shillong tang ka jingsahkut kali bad bym don jaka ïeng kali, katba shane ka jaka ka pahuh bha.

“Ngi la ïoh ban ai syrnod haduh 6 ngut kiba la dep shah hikai ha kine ki saw snem ban hikai lehniam ha ka Seng Khasi bad haduh mynta ki la don 30 ngut ki khynnah kiba la wan shah hikai” u la ong.

Kumta u la kyntu ïa ki tnad Seng Khasi ba kin phah ïa ki khynnah ban wan hikai khnang ba kin tip ïa ka lehniam.