Shillong, Risaw 20
Ka jingpyntrei ïa ka skhim sam um ha ki shnong kiba hap ha thaiñ nongkyndong, kata ka Jal Jeevan Mission (JJM) ka la ïaid shaphrang ha thaiñ Mawlai kata na Mawkynroh, Mawtawar shaduh Umrynjah bad ha kiba bun ki shnong mynta la jan dep ban pyntrei.
Kane ka skhim ka la ïaid ka jingpyntrei ha u snem 2022 bad napdeng ki shnong kiba kham heh ba la pyntrei ka dei ha Mawtawar kaba la rung hapoh ka skhim JJM lyngba ka jingtynruh ki nongmihkhmat naduh u MLA barim bad MDC ka Mawlai, ha ka por ba u Bah Renikton Lyngdoh Tongkhar u dang long u Myntri ka tnat PHE.
Haba buddien ïa ka jingpyntreikam ïa kane ka skhim, la ïathuh ba ki shnong ha Mawlai ki hap ha ka jingpeit jingkhmih ka tnat PHE ha kaba ki shnong ki hap ha ka jingpeit lang ka Investigation bad Electrical Division.
Kane ka jinglah ban pynïaid shakhmat ïa kane ka skhim ka dei ruh ha ryngkat ka jingïatreilang ki nongkitkam shnong lyngba ka Village Water and Sanitation Committee (VWSC) lem bad ki kontraktor kiba shahjied ban pyntrei, lem bad ka jingpeit ki karikor (engineer) bad ophisar ka tnat PHE.
Ki longïing ki la ap khmih ban ïoh ïa ka umbam lyngba kane ka skhim, bad mynta ka la jan dep ka jingpyntrei ha ki shnong kiba ïoh ïa kane ka skhim.
Ka thong jong ka Sorkar ban pynpoi um sha ki shnong ki thaw bad ki longïing lyngba ka JJM ka dei hapoh u snem 2024.
