Gaza, Risaw 20 (UNI)
Kumba 18 ngut ki Khristan ha Palestine ki la shah pynïap na ka jingther bom jong ka Israel hajan ka ïingmane jong ka Greek Orthodox Church ha Gaza City ha ka miet jong ka Sngi Palei, la ong ka tnat ka koit ka khiah ka Gaza kaba dei kaba la pynïaid da ka kynhun Hamas.
Katei ka tnat ka la ong ba hynnin ka miet, da ki phew ngut ki Khristan kiba la mynsaw ki la wan sha Al-Shifaa Hospital hadien ba la don ka jingther bom hajan ka ïingmane Church of Saint Porphyrius kaba la ïalam sha ka jingkhyllem jong ka kynroh ïingmane bad ka la wanrah jingmynsaw ïa ki Khristan kiba la pynlong jaka rieh ha kane ka ïingmane.
Ha ka kyrwoh khubor ba la phah sha ka Xinhua, ka Interior Ministry jong ka Hamas ka la ong ba ki la don “palat 400 ngut ki briew, Khristan bad Muslim, kiba la pynlong jaka rieh ha katei ka ïingmane kum shi bynta ban lait na ka jingshah ther ha ki bom jong ka Israel.”
Ha kawei pat ka liang, ka Israel Defense Forces (IDF) ha u kyrwoh khubor ka la ong ba ki liengsuiñ ïapom jong ka ha ka miet jong ka Sngi Palei ka la thombor ïa ki shlem jong ki ‘riew pyntriem ka kynhun Hamas hadien ba ki ‘nam ding ki la mih na kita ki shlem ban ther ïa ki jaka jong ka Israel.
Ka IDF ka la pynthikna ba ka kynroh jong ka ïingmane ka la khyllem bad ka don jingtip ruh shaphang ka jingïap bad jingmynsaw jong ki briew, bad ba ka dang peit bniah ïa kane.
Hynrei ka la kren shai ba katei ka ïingmane kam dei satia kaba ki shipai Israel ki la thmu ban thombor da ki bom. Ka IDF ka la ong ruh ba ka Hamas ka leh khnang da kaba buh ïa ki ktem jong ka ha ki jaka ba don ki ‘riew paidbah.
Ka IDF ka la kyntu biang ïa ki nong Gaza kiba don ha ki bynta ba Shatei ba kin mih noh na ki ïing ki sem jong ki khnang ban pynduna ïa ka jingmynsaw bad jingïap ki briew ba lui-lui.
