Nongstoiñ, Risaw 20
Ka Federation of Khasi Jaiñtia & Garo People (FKJGP) West Khasi Hill ha ka Sngi Thohdieng ka la leit ban khang tala noh ïa ka ‘Crusher’ lane ka kor tyllait maw jong ka kompeni shna surok Nongstoiñ – Wahkaji hadien ba ka FKJGP ka la lap ba kitei ki kor tylliat maw na ka liang ka kompeni ka la shu buh ban pyntrei khlem da pynbiang ïa ki kot ki sla kiba biang.
Ka kor tylliat maw jong katei ka kompeni ka dei kaba don ha kawei na ki jaka sah jong katei ka kompeni ha Mawkawan kaba hap hapoh ka shnong Mawthungkper, West Khasi Hills.
Nalor ka jingkhang tala ïa kitei ki kor tylliat maw, na ka liang ka FKJGP ka la khynra ruh ïa ki kot ki sla kum ki ‘labour licence’/’migrant labour licence’ jong ki nongtrei bar jylla kiba don ha katei ka jaka.
U Bah Carry Kharmutee, Vice-President ka FKJGP, West Khasi Hills u la ong hadien ba ka FKJGP ka la lap ba ki kor tylliat ïa kaba katei ka kompeni ka la buh kim don wat tang kawei ruh ka kot, kumta la khang noh ïa ki bad ka FKJGP ka la maham ruh ïa ki ba shuwa ba kin plie kin sa pyntip khnang ba hadien ba ki la biang ïa ki kot ki sla kin pyntrei ïa katei ka kor tylliat maw.
U la ong ruh ba ka jingleh jong ka FKJGP kam dei ba ka don da kano-kano ka jingmut ban pynthut ïa ka roi ka par lane ïa ka jingbha jong ka surok hynrei ka jingthmu ka long ba kino-kino kiba wan ban trei bad bylla hapoh ka Jylla ki dei ban wan da ka lynti bad ki dei ban biang ïa ki kot ki sla khnang kan ym thut.
U la ong ba katei ka dei tang ka jingsdang bad kiba bun ki surok hapoh West Khasi Hills, ka FKJGP ka ïohi ki kompeni bapher-bapher ki wan ïa ka ban buh ïa ki kor tylliat bad kiwei-kiwei.
Kumta na ka liang ka FKJGP kan ïai bteng ym dei tang ïa ki kot ki sla bad ha ka jingpeit jong ka FKJGP ïa ki kot ki sla jong ki nongtrei ka kompeni, la ïohi ba ki don kiba biang hynrei ka FKJGP ka shu buh ka jingmaham ba shuwa ban kut ka por kin pyndep noh ïa ka ban pynthymmai khnang ba ka jingpyntrei ïa katei ka surok kan ïaid beit ïaid ryntih.
“Kane kan long ruh ka jingmaham ïa baroh ki kompeni kiba wan shapoh West Khasi Hills ba lada ki mut ban buh ïa kano-kano, kin ïaid da ka kynti kaba dei katkum ka aiñ Sorkar ïa ka ban pynbiang ïa ki kot ki sla khnang ba kan ym ïatyngkhuh ba hap ban pynsangeh ïa ki kam kiba ki trei ïoh ka wan rah pynban ïa ka thut ka roi ka par ka dong ka thaiñ hi baroh ka wei ,” la ong u Bah Kharmutee.
