Nongpoh, Risaw 20
Ha ki artylli ki jingjia ïatyngkhuh bad kylla kali ha ka surokbah National Highway – 6 ha Ri-Bhoi District ha ka Sngi Thohdieng, uwei u briew u la khlad ha shen katba uwei pat u la mynsaw jur bad la pynkit noh ïa u sha ka jaka ai jingsumar.
Katkum ka tyllong khubor na ki pulit, la ïathuh ba ha kawei ka jingjia kylla kali kaba la jia ha ka por kumba 4:20 baje mynstep ha Shangbangla, kawei ka trok kaba don ïa u nombar ML-05-P-3599 kaba la ñiah da u Subruta Das, na 10 Mer, Assam ka la leit tyngkhuh ïa u maw ïaphiah surok ne u ‘divider’ katba ka dang thmu ban kiew sha Shillong kat haduh ba kan da kylla baji syndon.
Ha katei ka jingjia, u nongbud jong katei ka kali ba la tip kyrteng kum u Abijit Barbara (34 snem ka rta) na Laban, East Khasi Hills u la khlad noh hashen.
Ha kawei pat ka jingïatyngkhuh kali kaba la jia ha ka por 8:30 baje mynstep ha ka surokbah National Highway-6 ha ki bynta jong ka khlaw Umling, la ïathuh ba kawei ka trok kaba don ïa u nombor AS-25-FZ-8376 kaba dang hiar na nongbah Shillong sha Guwahati ka la leit ban jam ïa u maw ïaphiah surok bad leit tyngkhuh ïa kawei pat ka kali rit kaba don ïa u nombar ML-10-C-5589.
Ha kane ka jingjia u nongñiah jong ka kali rit uba la tip kyrteng kum u Ajrun Chettri na ka shnong Pahamlapong, Nongpoh u la mynsaw jur bad pynkit noh ïa u sha Nongpoh Civil Hospital na ka bynta ban ïoh ïa ka jingsumar kaba kyrkieh.
Shuh shuh la ïoh jingtip ba namar ka jingmynsaw jur, ïa u Chettri la pynkynriah noh na Nongpoh Civil Hospital sha Bethany Hospital, Nongpoh na ka bynta ban ïoh ïa ka jingsumar kaba paka.
Na ka liang ki bor pulit, ki la ïathuh ba u nongñiah jong katei ka trok hadien ka jingleit tyngkhuh ïa katei ka kali rit, u la phet bak na katei ka jaka bad na ka liang ki bor pulit ki dang pynlong ka jingthwet ban ïoh kem ïa u.
Ki la ïathuh ruh ba ïa kitei ki kali kiba ngat ha ka jingjia kylla bad tyngkhuh kali la rah noh sha thanad Nongpoh na ka bynta ban pynlong ïa ka jingtohkit bniah.
