Shillong, Risaw 20
U Rangbah Shnong Mawbah, Bah Arestone Thabah u la pynpaw ba lada don tang ar ïing ki Khasi ha Jhalupara, ïa ka kam Rangbah Shnong dei ban bat beit da u Khasi.
Kane ka jingpynpaw u Bah Thabah ka dei namar u kwah ban ïada na ka jingwan rung kyrthep kiwei ki bar jylla hapoh ka jylla lyngba katei ka shnong.
U la ong ba lada ïa ka bor synshar yn bat da kiwei ki jaidbynriew kim salia ban ai syrnod lada wan ki briew kiba nabar ka jylla namar kim sngewthuh ïa ka jingma jong ka jaidbynriew.
Nalor kata, u la pyntip ba ka shnong Jhalupara ka dei kaba hap ha Cantonment kaba dei ka jaka jong ki shipai kaba hap ruh ha ka South Shillong konstitwensi, hynrei ka buh jingma ruh ïa ki shnong ba marjan kum ka Mawbah, Nongsohphoh namar ki jingsniew ki mih bun bha na katei ka shnong.
U la ïathuh ha ka por ba u MLA ka West Shillong konstitwensi, Bah Paul Lyngdoh u khot jingïalang ïa nongïalam shnong halor u drok, ki la pynpaw ba ka jingsniew kaba jur ka wan na jaka ba sah ha Cantonment namar ki briew ki bym ithuh ki wan sher dara.
Namar kata, u la kyntu ïa ka bor sorkar ba lada kim ithuh ïa ka kot ba ai ki Rangbah Shnong kiba shu kam ha Jhalupara kim nud ban ai syrnod ïa kiwei ki bar jylla.
“Kumba ka Council ka la pynduh ïa ki Rangbah Shnong kiba shu kam ha Mawbah, nga kwah ba ka KHADC kan pynduh ruh ïa ki Rangbah Shnong kiba shu kam ha Jhalupara” u la ong.
Ha kajuh ka por u la kyntu ïa ki para Khasi lada ki don tang ar ïing ha Jhalupara ki dei ban mih shakhmat ban bat ma ki ïa ka kam Rangbah Shnong khnang ban shngaiñ ka jaidbynriew.
U Bah Thabah u la ong ba lada don kiba dih drok ha Jhalupara ki don kiba la wan ujor, hynrei ym lah ban leh eiei namar kam hap shuh ha ka jingpeit jong ka shnong Mawbah.
