New Delhi, Risaw 20
Ka kynhun Hamas kaba synshar ïa ka Gaza ka la pynbna ha ka Sngi Thohdieng ba ka shnat kieng atiar jong ka, ka la pyllait noh ïa arngut ki nongshong shnong ka America kiba napdeng ki 200 ngut eiei kiba la shah rahbor ha kane ka kynhun na ka Ri Israel naduh ka 7 tarik Risaw.
Ha ka khubor ba la pyllait lyngba ka Telegram, la ong ba da ka jingtuklar ka Ri Qatar, ka Al-Qassam Brigades ka la pyllait noh ïa arngut ki nongshong shnong ka America kiba dei shi kmie shi khun. La ong ba ka jingpyllait ïa kine ka dei da ka mynsiem pyrkhat para briew.
Hynrei katei ka kynhun pyntriem ka khlem pyntip shai kumno bad mynno la pyllait ïa kitei arngut.
Ha kane kajuh ka sngi, ki shipai Israel ki la ong ba kiba bun na kito kiba la shah rahbor sha Gaza ki dang im.
“Kiba bun napdeng kiba la shah rahbor ki dang im. Ki la don ruh ki metïap kiba la rah noh sha Gaza Strip,” la ong ki shipai Israel.
Nalorkata, ki shipai Israel ki la ong ruh ba palat 20 ngut na kiba la shah rahbor ki dei ki khynnah katba hapdeng 10 bad 20 ngut ki dei kiba la palat ïa ka 60 snem ka rta.
Shuh shuh kitei ki shipai ki la ong ba hapdeng 100 haduh 200 ngut ki briew ki dang jah rngai naduh ba ka Hamas ka la wan hiar thma.
Ha ka 7 tarik Risaw, katei ka kynhun pyntriem ka la wan thombor ïa ka Israel bad haduh mynta, palat 1,400 ngut ki la shah pynïap bad kiba bun na kine ki dei ki ‘riew paidbah.
Na ka liang ka Israel ka la thombor kylla da ki bom bad haduh mynta, kumba 4,137 ngut ki la shah pynïap ha Gaza, bad kham bun na kine ruh ki dei ki ‘riew paidbah, la ong ka tnat ka koit ka khiah jong ka Gaza ba la pynïaid da ka Hamas.
