Shillong, Risaw
Ha ka jingpyllait khubor jong u Bah S. Lyngdoh Publicity Secretary jong ka seng Ïeng Rasong Sports Social and Cultural Club, Shillong u la pyntip ba na ka liang jong ka Seng ha ka jingïatreilang bad ka Yess Meghalaya ka la dep ban pynlong ïa ka sien kaba ar jong ka Awareness Programme on Drug Abuse and a Manace to tha Society ha ka 3 tarik, Risaw, 2023 ha Community Hall Nongmensong Shillong ha ka por 2 baje nohphai sngi.
Ha katei ka sngi ïa ka prokram la pynïaid da i Kong Lydia L Khongsngi Social Secretary jong ka Seng. La ïoh ka jingkren plie na i Bah D. Khonglah Deputy Rangbah Shnong jong ka Dorbar Shnong Nongmensong la pynbud ka jingkren bad ka jingduwai na i Pastor Bidonbok Syiem ine i la ban jur shaphang ki khynnah samla ha kine ki sngi ba mynta kiba la ktah bad kyrni ha u drok. I la ong ruh ba dei ban pynbun kum kine ki Councelling Center ban pynshai bad pynsngewthuh ïa ki samla kiba im kyrni ha ka jingdih drok. Hadien kane la pynbud sa ka jingkren na i Bah H.S. Kharpran MLA Mawryngkneng bad ha ka jingkren jong i i la ong ba dei ban pynlong kum kine ki jait prokram sha ki thaiñ nongkyndong namar ba la sdang ban suhthied kum kine ki jait jingdih pynbuaid kiba ktah ïa ka longbriew-manbriew. La pynbud sa ka jingkren na i Bah Meban Tariang Councellor jong ka KRIPA Foundation ha ka jingkren jong i ruh i la ïathuh ba i la mad ha kum kine ki jingdih pynbuaid bad mynta i la kylla noh sha ka jingim kaba thymmai bad i la trei ha ka KRIPA Foundation la bun snem bad i la ai jingmut ïa ki khynnah samla synrang bad kynthei ba ki dei ban kiar na ki jingdih ba sniew kum u drok bad kiwei kiwei. I la ong ruh ba dei ban ainguh bad ban buh jingduwai ha U Blei ba Un pyllait ïa kine ki jingdih na ka jingim jong ki.
Nalor kine, la ïoh jingkren ruh na i Kong Rosana Lyngdoh iba long i Director jong ka Impulse NGO Network Shillong. Ha ka jingkren jong i i la ong ba na ka liang jong ka NGO ka la trei na ka bynta ka Human Trafficking shaphang u drok bad i la ban jur ruh ïa kane ka jingkyrni ba ka pynkylla ïa ki briew ba kin thok bad ban tuh ban thiem tang ban ïoh thied ïa u drok. Ha kaba ïadei bad kane, i la kyrpad jur ïa ka Dorbar Shnong bad ka sorkar kumjuh ba kin thaw ki lad ki lynti ban pynbun ïa ki Rehabilation Centre ha ki distrik bapher bapher.
Ha kane ka sngi la ïoh ïa ka jingkren pynwai na i Bah D. Lamare General Secretary jong ka SEng ha kaba i la ai khublei kyrpang ïa ka Dorbar Shnong Nongmensong ba ki la ai jingbit ban pynlong ïa kane ka prokram kaba jop, nalor kane i la ai khublei ruh ïa baroh kiba la ai jingkren bad kiba la shah khot sngewbha sha ka prokram, kynthup ïa ki Seng Samla, Seng Longkmie, ki Asha bad Aganwadi, ki khynnah skul jong ka thaiñ Nongmensong bad ki Press bad ki Media bad kiwei kiwei ruh kiba don ryngkat lang.
