Jowai, Risaw 22
Namar ka jingsngew-khia halor ka jingnang kiew ka jingdon jong ki khynnah kiba kyrni ha ka jingpyndonkam drok hapoh East Jaiñtia District, ka Jaiñtia Students Union (JSU) ka la phah dorkhas sha u Myntri ka tnad Social Welfare ka Sorkar Jylla, u Bah Paul Lyngdoh ha kaba ka la pynpaw ïa ka jingdonkam kyrkieh ban wanrah ïa ka ‘Drug Addiction Rehabi-litation Centre’ (DARC) khnang ban ïarap ïa ki khynnah kiba la ngat ha kane ka jingeh.
Ka JSU ha u kyrwoh lyngba u Bah Livingson Sama kum President bad Ajoymeson Lyngdoh kum Secretary ki la pynpaw ba ka jingeh namar ka jingnang kiew ha ka jingdon jong ki nongpyndonkam drok hapdeng ki khynnah samla kam dei shuh ka jingeh kaba dang thymmai hapoh ka East Jaiñtia Hills District.
Hynrei, katba nang ïaid ki sngi ki por kane ka distrik ka la kylla long kaba hakhmat eh halor ka jingdon jong ki khynnah samla kiba pyndonkam drok ha ka Jylla hi baroh kawei, bad kaba kham sngewkhia shuh-shuh ka long ruh namar napdeng kine ki nongpyndonkam drok kham bun ki dei ki khynnah kiba dang khie samla.
Ha ka jinglap jong ka JSU la ong ba ki khynnah ha kine ki snem kiba mynta la ïohi ba ki la leh ngiah bad thait ban pynleit jingmut ha ki jingpule, ha ki kam ïalehkai (sports) bad ha kiwei pat ki bynta kiba tei ïa ka jingim.
Kumta khnang ban lah tehlakam ïa kine ki jingeh, na ka liang ka JSU ka kyrpad jur ïa ka Sorkar lyngba une u Myntri ba dei khmih ban shimkhia lem khnang ban lah wanrah noh da ka katei ka jaka sumar hapoh ka distrik khnang ba kito ki longïing kiba kham duna ha ka liang ka ïoh ka kot kin ïoh jingïarap na kane ka jaka.
