Nongstoiñ, Risaw 22
Hadien 18 sngi ba ki bahaïing hasem u Bah Lostar Nongphud ha ryngkat ka jingïatip lang jong ka shnong Maw-siangbah, West Khasi Hills lem bad ka jingïasnoh kti lang jong kiwei pat ki shnong ba marjan, bad kumjuh ruh ki pulit, ki la pynlong ïa ka jingwad, ha ka Sngi U Blei ki la lap pynban ba u la khlad.
Ki nongkitkam shnong ka Mawsiangbah haba pyntip sha u nongthoh khubor ïa kane, ki la ïathuh ba ïa utei u rangbah la lap ha ka por kumba 3:30 nohphai sngi jong ka Sngi U Blei na kawei ka jaka khlaw kaba don ka wah rit ïa kaba la tip kum ka ‘Mawthawphan’ kaba hap ha u pud u sam jong ka shnong Tiniang ha West Khasi Hills.
Shuh shuh ki la ong ruh ba hadien ba la lap, na ka liang jong ka shnong ka la pyntip sha ki pulit bad la ong ruh ba ki pulit ki la hiar sha katei ka jaka.
Lah ban kdew hangne ba u Bah Lostar Nongphud, 40 snem ka rta, na ka shnong Mawsiangbah u la jah bad khlem wanphai ïing shuh naduh ka 4 tarik Risaw hadien ba u la leit sha khlaw ban leit wad dieng kseh ban thang.
Namar katei ka jingbym wan phai ïing shuh, na ka liang ki bahaïing bad ka shnong lem bad kiwei pat ki shnong ba marjan ki la pynlong ka jingwad ïa utei u rangbah ha kylleng ki jaka ha katei ka thaiñ, hynrei ha ka Sngi U Blei ki la lap noh ïa ka met ka jong u na ‘Mawthawphan’.
