Nongstoiñ, Risaw 22
Kumba ha ka Jylla bad ha ka Ri baroh kawei ki kynmaw burom ïa ki pulit kiba la khlad noh ha ka jingïakhun bad ïaleh na ka bynta ka ri kaba long ha ka 21 tarik Risaw 2023, ka tnad pulit ka West Khasi Hills ruh ka la ïoh ban kynmaw bad leh burom ïa ka sngi kaba la tip kum ka ‘Police Commemoration Day’ ne ka jingkynmaw burom ïa ki pulit kiba la duh noh ïa la ka jingim katba ki dang don hapdeng ka jingshakri.
Ïa kane ka jingleh burom la pynlong ha phyllaw jong ka shlem treikam u Superintendent of Police ka West Khasi Hills, ha kaba u Deputy Commissioner ka West Khasi Hills, u Bah Garod L.S.N. Dykes, IAS u la ïadonlang, ha ka jingdonlang u SP ka West Khasi Hills, u Bikram D. Marak MPS, u Bah Lakador Syiem, MPS Commandant ka 4th MLP Bn Sohpian, u Bah Donkupar Moksha Addl. SP Head Quarter nalor kiwei-kiwei.
Nalor ki heh pulit ka distrik la donlang ruh ki bahaïing hasem jong ki pulit kiba la khlad noh ha ka jingïaleh, ki khynnah skul, ki nonghikai bad kiwei-kiwei.
Ha katei ka sngi kum ka dak jong ka jingkynmaw bad leh burom ïa kitei ki pulit kiba la khlad noh, la ïoh ban pynlong ruh ïa ka jingsngap jar, ka jingbuh syntiew ïa kaba la ïashim bynta da ki bahaïing hasem, u DC ka WKH ha ryngkat ki heh pulit ka distrik, nangta la ïoh ruh ïa ka ‘Commemoration Parade’ na ki pulit.
U Superintendent of Police ka West Khasi Hills u Bikram D. Marak, MPS haba kren ha katei ka sngi u la pynkynmaw ba ïa katei ka sngi la ju rakhe ha man la u snem ha kaba ki pulit ki la leh ha kylleng ki jaka jong ka Ri ïa ki para pulit kiba la khlad noh na ka jinglenlade ban ïada ïa ki paidbah kum ka ri hi baroh kawei.
U SP u la pule ruh ïa ki kyrteng jong baroh ki pulit kiba la duh noh la ka jingim ha ka jingshakri ïa ka kam ban aiti la ka jingim na bynta ka Ri.
U la ïathuh ruh ba hapoh ka Jylla ki don haduh 127 ngut ki pulit kiba la ïap ha ka jingïaleh bad 2 ngut ki dei napoh ka West Khasi Hills District kiba la khlad noh ha ka jingïaleh katba ki dang don hapdeng ka jingshakri.
Shuh shuh ïa kane kajuh ka jingkynmaw burom la pynlong ha shlem treikam ka 4th MLP Battalion Sohpian, ha kaba u Bah Lakador Syiem, MPS Commandant ka 4th MLP Bn Sohpian u la donlang, kumjuh u SP ka West Khasi Hills, u Bikram D. Marak, u Sordar ka shnong Sohpian, u Bah Sirian Wahlang, ki paidbah nongshong shnong ka Sohpian bad kiwei-kiwei.
