Shillong, Risaw 22
Ka jingpluh kaba shyrkhei jong kawei ka ïing kaba la jia ha Khyndai Lad ha ka 14 tarik mynta u bnai ka la ïaid mynta la shi taïew. Na ka liang ki bor Sorkar ki dang ap ïa ka kaiphod na ka National Institute of Technology (NIT) Guwahati ha ryngkat ki jingai jingmut la ka ïing ka dang shngaiñ ne kam shngaiñ shuh, bad lada kam shngaiñ shuh kamut hap ban pynpra noh ïa ka ïing baroh kawei.
Ka jingtohkit da u majistor, Bah R. Wahlang ruh ka dang ïaid, bad dang pdiang ruh ïa ki sakhi kiba wan shakhmat ban batai ïa kaei kaba ki tip bad ïohi haba ïadei bad ka jingpluh jong ka ïing.
Ka por ban pyndep ïa ka jingtohkit da u majistor ka dei 10 sngi naduh ka tarik ba la thung ïa ka jingtohkit.
Ha kane ka jingjia uwei u briew u la khlad namar ka jingïap op na ka tdem ha ka por ka ding ka sdang ban klang.
Dang shen ka tnat Disaster Management ka Sorkar Jylla ka la phah khmih bniah ha ka NIT ïa ka ïing kaba la julor namar ka jingpluh bad ban ai jingmut kumno ban leh ïa katei ka ïing kaba la julor, la ka dang long ne em kaba shngaiñ.
Kum ban pynkynmaw, ka ding kaba klang ka la bamduh ïa ki jingdon jingem kiba don hapoh jong ka ïing mala ha Khyndai Lad bad ka jingpynlip ïa ka ding ka la shimpor haduh 24 kynta.
Kane ka ïing ka dei kaba don ki dukan kiba die ïa ki shuki ki miej, ki jaiñ ki nep bad kiwei kiwei ki tiar.
Ka jingkhlaiñ jong ka ding bad ka jingkhim jong ki lynti ban poi sha ka jaka ba pluh ka la pynlong ban shimpor ïa ki kali pynlip ding ban poi kham kloi.
Ki bor pynïaid district ki la hap ruh ban pan jingïarap lang na ki shipai suiñ ban phah ïa ki kali pynlip ding.
