Nongpoh, Risaw 23
Kawei na ki dukan bamja kaba la bna nam bha ha ka Jylla, ha kaba bun ki nongleit nongwan lyngba ka surokbah National Highway-6 ki ju tip paidbah kum ka dukan ‘Pyrda Saw’ mynta ka sngi ka la lah ban pynïar ïa ka shnat jaka bam jong ka harud jong ka surokbah National Highway-6 kaba don marjan bad ka shnong Lumbyrhing.
Ïa kane ka shnat jaka bam bathymmai kaba long trai da u Bah Kmenson Syngkli bad ka Kong Ridalin Warjri la plie paidbah hynnin ka sngi, bad la tip kyrteng kum ka Green Hills Restaurant kaba don ha ki ar bynta, kata kawei na ka bynta kito ki bym ju bam doh, lane ka ‘Vegetarian’ katba kawei pat ka dei na ka bynta kito kiba bam doh, lane ka ‘Non-Veg’ bad kane ka jaka bam kan sdang ban plie sha ki paidbah nongleit nongwan naduh ka 23 tarik u Risaw mynta u snem.
Ïa kane ka jaka bam bathymmai jong ki trai ka dukan ‘Pyrda Saw’ la wan ban plie paidbah da u Bah Donroi Kharkongor, Elder jong ka Balang U Khrist Nongpoh ha ka jingdon ryngkat kiwei-kiwei ki nongïalam Balang, ki ‘riewngeit, ki bahaïing hasem bad ki paralok parajor.
Hashuwa ka jingplie ïa katei ka jaka bam, na ka liang ki nongïalam niam ki la pynlong ïa ka jingïaseng lyngkot bad ka jingduwai kyrpang kum ka dak jong ka jingkyrkhu kyrdoh bad ka jingai mynsiem ïa ki trai ba kin lah ban ai ïa ka jingshakri kaba paka sha ki paidbah nongleit nongwan.
Kumba long mynta, bun na ki dukan bam kiba don harud ka surokbah National Highway, kim don satia ïa ka jaka pynïeng kali kaba biang ban pynsuk ïa ki nongwan bam. Pynban ha kane ka jaka bam bathymmai jong ka Green Hills Restaurant, ka don ïa ka jaka pynïeng kali kaba heh bad kaba pynsuk ïa ki nongleit nongwan ban bam.
Nalor kitei ki jingbam ‘Veg’ bad ‘Non-Veg’, ka Green Hills Restaurant ka don ruh ïa ka ‘Mocktail Bar’ kaba don ïa ki jingdih umsoh kiba bun jait ki ban pynum ïa u ryndang jong ki nongleit bam ha katei ka jaka.
